इंडियन प्रिमियर लीग क्रिकेट स्पर्धा सुरू होऊन आता २० ते २५ दिवसाचा कालावधी झाला आहे. यवतमाळ जिल्ह्याभरात तसेच विदर्भातील क्रिकेट सट्टेबाज आता चांगले सक्रिय झाले आहेत. यात दररोज कोट्यावधी रुपयाची उलाढाल होत आहे. यामध्ये सट्टेबाज चांगलेच मालामाल झाल्याची चर्चा आहे. पोलिसांची आयपीएलच्या सट्टेबाजारावर नजर असून काही प्रमाणात कारवाई झाली आहे. पण गळाला छोटे मासे लागत असल्याने जिल्ह्यातील मोठे बुंकी, सट्टेबाज अजूनही दूर आहे.
जिल्ह्यातील काही नामांकीत बुकी भूमिगत झाले आहे. त्यामुळे संपूर्ण देवाण-घेवाणीचा खेळ आता फंटरवर सोडण्यात आला आहे. सट्टेबाजांनी निर्माण केलेली चेन पोलिस प्रशासन यंदा तोडणार का, असा प्रश्न आता उपस्थित केल्या जात आहे. अल्पावधीत पैसे कमविण्यासाठी आता सट्टेबाजीला ऊत आला आहे. यात मागील काही वर्षांपासून आयपीएल क्रिकेट स्पर्धेची भर पडली आहे.
आयपीएल सट्टेबाजारात यंदा कोट्यवधींची उलाढाल होण्याची शक्यता वर्तविली जात आहे. त्यामुळे शेकडो युवक यात भरभटली जात असल्याने अनेक कुटुंब उद्ध्वस्त होण्याच्या मार्गावर असल्याचे चित्र जिल्ह्यातील शहरी भाग, तालुक्यात तसेच ग्रामीण भागात दिसत आहे.आयपीएलची सुरुवात झाल्यापासून कोणत्या ॲपवर सट्टा लावायचा, कोण जिंकणार, कोणता संघ चांगला आहे. यासह अनेक चर्चा सध्या तरुणांमध्ये रंगत आहेत.
आयपीएलचा हंगाम सुरू झाल्यानंतर सट्टेबाजारात कोट्यवधींची उलाढाल होते. तरुणांना आकर्षित करण्यासाठी अनेक वेबसाईटच्या लिंक सोशल मीडियावर व्हायरल होत आहे. साधारणतः दीड ते दोन महिने चालणार्या स्पर्धेतून सट्टेबाज चांगलेच मालामाल होत असल्याचे दिसत आहे. यात तरुण मंडळीसह व्यावसायिकसुद्धा गुंतल्या जात आहे. जिल्ह्यातील यवतमाळ, वणी, पांढरकवडा, पुसद, उमरखेड, घाटंजी ,नेर ,दारव्हा, राळेगाव तालुक्यात सट्टेबाजीची पाळेमुळे रोवली आहे. गेल्या काही वर्षांपासून सट्टेबाजीतून कोट्यवधींची संपत्ती कमविणार्या बुकींकडे पोलिसांनी अर्थपूर्ण दुर्लक्ष केले आहे.
पोलिस हताश हॉटेल बिअर बार फुल्ल.
आयपीएल क्रिकेट स्पर्धेदरम्यान सट्टेबाजारावर पोलिसांचे लक्ष राहणार काय असा प्रश्न चिन्ह निर्माण होत आहे. मात्र, ऑनलाईन सट्टा चालत असल्याने पोलिसांचाही नाईलाज असल्याचे दिसून येत आहे. हॉटेल बिअर बारमध्ये ऑनलाईन सट्टा घेणे किंवा लावणी सुरू असल्याने त्यामध्ये बारमालकाचा फायदा आहे. त्यामुळे शहरात उशिरापर्यंत हॉटेल आणि बार सुरू असतात निवांत बसण्याचे ठिकाण म्हणून युवकांनी बार हॉटेलला पसंती आहे.
आयपीएल क्रिकेटच्या सामन्यातील प्रत्येक चेंडूवर सट्टा लावण्यात येते. जिल्हाभरात वेगवेगळ्या तालुक्यातील तरुण मुलांना हाताशी घेऊन हा खेळ मोठ्या प्रमाणात खेळविल्या जात आहे. यामध्ये प्रामुख्याने राणू, आशू, कालु, निलेश, ईमरान, कमलेश, अमिष, रितेश, बंटी, भोंगडे, सोहेल, संदिप, जाफर, मोबीन शेख, गोलु, जम्मू, मिनाज, ईजार, समी आदी बुकींचे फंटर जिल्ह्याभरात पसरलेले आहे. अशा बुकीवर कारवाई करण्याचे धाडस जिल्हा पोलिस दाखवतील का, असा प्रश्न उपस्थित केल्या जात आहे.