अंतराळवीर सुनीता विलियम्स आणि बुच विल्मोर 9 महिन्यांनी पृथ्वीवर परतले आहेत. त्यांचा एक व्हिडीओ आता समोर आला आहे ज्यात त्यांना स्पेस क्राफ्ट मधून बाहेर काढलं जात आहे. हे दोन्ही अंतराळवीर फक्त 8 दिवसांच्या मिशनसाठी गेल्यावर्षी जूनमध्ये स्पेस स्टेशनवर गेले होते. परंतु तांत्रिक बिघाडामुळे त्यांचा मुक्काम वाढला.
सुनीता विलियम्स आणि बुच विल्मोर यांनी गेल्यावर्षी 5 जूनला Boeing Starliner स्पेसशिपच्या माध्यमातून अवकाशात भरारी घेतली होती. आणि आता SpaceX च्या Dragon स्पेसक्राफ्टच्या माध्यमातून ते परत आले आहेत. त्यांचं कॅप्स्यूलनं फ्लोरिडाच्या किनाऱ्या जवळील समुद्रात उतरण्यापूर्वी पॅराशूट ओपन केला होता. या कॅप्सूलमध्ये नासाचे निक हेग आणि Roscosmos चे अलेक्झांडर गोरबुनोव हे दोन अंतराळवीर देखील होते. इंटरनॅशनल स्पेस स्टेशनवरून पृथ्वीवर येण्यासाठी या चारही अंतराळवीरांना 17 तासांचा प्रवास करावा लागला.
नासाचे दोन्ही अंतराळवीरांनी भारतीय वेळेनुसार आज म्हणजे बुधवारी 19 मार्चला पहाटे 3.30 वाजता फ्लोरिडाच्या किनाऱ्यावर वर सुरक्षित लँडिंग केली. SpaceX कॅप्सूल स्पेस स्टेशनवरून निघाल्यानंतर काही तासांनी मेक्सिकोच्या खाडीत याचा स्प्लॅशडाउन झाला. NASA नं अंतराळवीरांच्या लँडिंगचा व्हिडीओ देखील जारी केला.
लँडिंग झाल्यावर का नेण्यात आलं स्ट्रेचरवर
या व्हिडीओ मध्ये सुनीता विलियम्स यांना स्पेसएक्सचे कर्मचारी कॅप्स्यूलच्या बाहेर काढत असल्याचं दिसत आहे. नऊ महिने अंतराळात राहिल्यामुळे त्यांना गुरुत्वाकर्षणाची सवय राहिली नाही. त्यामुळे त्या उभ्या राहू शकत नाहीत हे व्हिडीओ मध्ये दिसत आहे. त्यामुळे स्पेसएक्सच्या कर्मचाऱ्यांनी त्यांना आधार देऊन उभं केलं आणि स्ट्रेचरवर झोपवलं. पृथ्वीवरील परिस्थितीशी पुन्हा जुळवून घेण्यासाठी त्यांना अजून काही काळ जाईल.
सुनीता विलियम्स आणि बुच विल्मोर गेल्यावर्षी 5 जूनला बोईंग स्टारलाइनर मध्ये बसून ISS कडे रवाना झाले होते. त्यांचे मिशन फक्त 8 दिवसांचे होते, परंतु बोईंगच्या यानातील तांत्रिक बिघाड आला आणि नासाने त्या यानातून दोन्ही अंतराळवीरांना परत आणण्याची जोखीम घेतली नाही. परंतु आता स्पेसएक्सच्या यानातून दोन्ही अंतराळवीर पृथ्वीवर सुखरूप परतले आहेत.