शासकीय नोकरीच्या प्रतीक्षेत असलेल्या बागलाण येथील एका तरुणाच्या वडिलांना तिघांनी हेरून सिन्नर तहसीलदार कार्यालयातील लिपिक पदावर निवडीचे पत्र देत साडेआठ लाख रुपये उकळल्याचा धक्कादायक प्रकार उघड झाला आहे. त्या निवड पत्रावर नाशिक जिल्हाधिकारी कार्यालयातील उपजिल्हाधिकाऱ्यांची बनावट स्वाक्षरी व शिक्का असल्याचेही समोर आले.
याबाबत बागलाण येथील ताहाराबादचे रहिवासी हेमराज गंगाराम गायकवाड (वय ४८) यांनी फिर्याद दिली. त्यानुसार बाळू दादा जाधव (रा. दुडगाव), मुन्ना सोन्या कुंवर, शरद दत्तात्रय राजगुरू उर्फ पाटील या तीन संशयितांविरुद्ध गुन्हा नोंद आहे. हेमराज हे एका आश्रमशाळेत कामाठी पदावर कार्यरत असून, त्यांच्या मुलाने सामाजिक कार्य विषयात पदवी संपादित करून डी. एड. पर्यंतचे शिक्षण पूर्ण केले आहे. मात्र, काही वर्षांपासून हेमराज यांचा मुलगा शासकीय नोकरीच्या प्रतीक्षेत असल्याने ते विवंचनेत होते. दरम्यान, १२ सप्टेंबर २०२३ रोजी हेमराज हे कामानिमित्त जिल्हाधिकारी कार्यालय परिसरात आले होते. त्यावेळी संशयितांसोबत त्यांची ओळख झाली.
यावेळी ‘आमची बऱ्याच शासकीय कार्यालयात ओळख आहे. तुमच्या मुलाला नोकरी लागेल पण, दहा-बार लाखांचा खर्च येईल’, असे संशयित म्हणाले. शासकीय नोकरी मिळेल, या हेतूने हेमराज यांनी संशयितांना होकार दिला. त्यानंतर तिघांनी हेमराजच्या मुलाची सिन्नर तहसीलदार कार्यालयात लिपिक व टंकलेख पदावर निवड झाल्याचे पत्र दिले.
गंभीर बाब म्हणजे, निवडीच्या पत्रावेळी मुंबईतील जे. जे. रुग्णालयात वैद्यकीय तपासणी झाल्याचेही पत्र दिले. या पत्रांवर विश्वास ठेवत हेमराज यांनी संशयितांच्या बँक खात्यात ई-स्वरुपात पाच लाख रुपये जमा केले. तर तीन लाख रुपये रोख रक्कम दिली. मात्र, सर्व बनावट असल्याचे उघड झाले.