धुळे शहरातील जुने धुळे भागातील बर्फ कारखाना रस्त्यावरील गणेश मंदिरासमोर आज सकाळी महापालिकेच्या घंटागाडीने दीडवर्षीय बालकाचा चिरडले. या घटनेनंतर नागरिकांनी मोठी गर्दी करीत रोष व्यक्त केला. चालकाला तात्काळ ताब्यात घेऊन कठोर कारवाईची मागणी केली. दरम्यान, आझादनगर पोलिसांनी चालकासह दोघांना ताब्यात घेतले. दुपारी उशिरापर्यंत गुन्हा दाखल करण्याचे १८ सुरू होते. जुने धुळे भागातील बर्फ कारखाना रस्ता परिसरात आज सकाळी बीजी ३४९६ क्रमांकाची घंटागाडी कचरा संकलित करण्यासाठी आलेली होती. त्यादरम्यान शौर्य मयुर बडगुजर हा दीड वर्षीय बालक घराबाहेर खेळत होता. तेव्हा घंटागाडी चालकाने हलगर्जीपणे वाहन पाठीमागे घेताना शौर्य हा घंटागाडीच्या चाकाखाली आला. त्याला काही फुटापर्यंत फरफटत नेले. त्यात तो गंभीर जखमी झाला.
घटनेनंतर घंटागाडी चालकासह दोघे वाहन जागीच सोडून पसार झाले. परिसरातील नागरिकांनी बालकाला तात्काळ उपचारासाठी जिल्हा रुग्णालयात दाखल केले असता डॉक्टरांनी त्यास मृत घोषित केले. घटनेनंतर परिसरातील नागरिकांनी मोठी गर्दी करीत संताप व्यक्त केला. घंटागाडी चालकावर कठोर कारवाई करावी, अशी मागणी केली. अपघाताची माहिती मिळताच आझादनगर पोलिस ठाण्याचे कर्मचारी घटनास्थळी दाखल झाले. त्यांनी घंटागाडी जप्त करीत पोलिस ठाण्यात आणली. तसेच घंटागाडी चालकासह दोघांना ताब्यात घेतलं.
दरम्यान, मयत शौर्य हा घरचा एकुलता एक होता. त्याचे वडील मयुर बडगुजर हे फरशी बसविण्याचे काम करतात. चिमुकल्याच्या दुर्दैवी मृत्यूमुळे बडगजुर परिवाराने एकच आक्रोश केला. या घटनेमुळे परिसरात हळहळ व्यक्त केली जात आहे. शहरात महापालिकेने कचरा संकलनाचा खाजगी कंपनीला ठेका दिला आहे. त्यानुसार कंचरा संकलनाचे काम केले जाते. पंरतु, या घंटागाड्यांवर कोणाचाही अंकुश दिसून येत नाही. आधीच हा घंटागाड्या नियमित येत नाहीत, आल्याच तर घाईघाईत निघून जातात.