“तुमची मुलगी सेक्स रॅकेटमध्ये…” फेक फोन कॉलमुळे मुलीच्या आईचा मृत्यू; कुठे घडली घटना?

मालती वर्मा या आग्रा येथील महाविद्यालयात शिक्षिका होत्या

मालती वर्मा या आग्रा येथील राजकीय कन्या ज्युनिअर हायस्कूलमध्ये शिक्षिका म्हणून काम करत होत्या. त्यांचे पती निवृत्त झाले आहेत. तर त्यांना एक मुलगा आहे त्याचं लग्न झालं आहे. त्यांना दोन मुली आहेत ज्या शिकत आहेत. ३० सप्टेंबरला त्या वर्गात मुलांना शिकवत होत्या, त्यावेळी त्यांना डिजिटल अरेस्टचा कॉल आला. ज्या नंबरवरुन फोन आला होता त्यावर पोलिसाचा फोटो होता त्यामुळे मालती वर्मा यांनी तो फोन कॉल उचलला. त्या फोनवर बोलणाऱ्या माणसाने सांगितलं की तुमची मुलगी सेक्स रॅकेटमध्ये अडकली आहे. तिला आम्ही ताब्यात घेतलं आहे. तिला सोडवायचं असेल तर एक लाख रुपये ऑनलाइन पाठवा. तुम्ही असं केलं नाही तर आम्ही तिला तुरुंगात धाडू, पण तुम्ही एक लाख रुपये दिले तर तिच्यावर कुठलीही कारवाई होणार नाही आम्ही तिला सोडून देऊ. असं त्या कॉलरने मालती वर्मा यांना सांगितलं.

मालती वर्मा यांनी मुलाशीही फोनवरुन केली चर्चा

मालती वर्मा यांनी फोन ठेवला पण त्या भीतीने गर्भगळीत झाल्या. त्यांची प्रकृती बिघडली. हा कॉल त्यांना एकदाच आला नाही. त्यानंतरही आला. त्यामुळे त्या घाबरल्या त्यांना ताण आला. त्या ताणामुळे हृदयविकाराचा झटका आला. मुलीला सेक्स रॅकेटमध्ये पोलिसांनी ताब्यात घेतलं आहे हे म्हटल्यावर त्या घाबरुन गेल्या. मालती वर्मांना फोन आल्यानंतर मालती वर्मांनी त्याबाबत त्यांच्या मुलालाही सांगितलं. त्यानंतर मुलाने त्याच्या बहिणीला फोन केला होता. त्याने आईला फोन करुन सांगितलं की त्याची बहीण म्हणजेच मालती वर्मांची मुलगी कॉलेजमध्ये आहे. मुलाने आईला सांगितलं की घाबरु नकोस तो फेक कॉल होता. मात्र मालती वर्मा कॉल जास्तवेळा आल्याने टेन्शनमध्ये आल्या होत्या. त्या कशाबशा घरी पोहचल्या. त्यांच्या छातीत दुखू लागलं. त्यांना तातडीने आग्रा येथील सरोजिनी नायडू मेडिकल रुग्णालयात घेऊन गेले. मात्र तिथे डॉक्टरांनी त्यांना मृत घोषित केलं. या घटनेची माहिती मिळाल्यानंतर पोलीस त्यांच्या घरी गेले. त्यावेळी त्यांना फेक कॉल कसा आला होता आणि पुढे काय काय घडलं ते पोलिसांना समजलं.