रितू मालूवर असलेल्या आरोपींचे गांभीर्य लक्षात घेता तिने नियमित जामिनासाठी अर्ज केल्याशिवाय तिला समाजात मोकळे सोडता येणार नाही. तसे केल्यास ते न्यायसंगत (इट विल बी मिसकॅरिएज ऑफ जस्टिस) ठरणार नाही, असे निरीक्षण नोंदवित सत्र न्यायालयाचे न्यायाधीश आर. एस. पाटील-भोसले यांनी रितू मालूला जामीन रद्द केला. तसेच तपास अधिकाऱ्याला तिला अटक करण्याची मुभा असल्याचे स्पष्ट केले.
नागपूर हिट अँड रन
फेब्रुवारी महिन्यात झालेल्या रामझुला हिट अँड रन अपघातात दोघांचा मृत्यू झाला होता. तहसील पोलिसांचा तपास निष्पक्ष नसल्याने अपघातातील मृतकांच्या कुटुंबीयांनी उच्च न्यायालयात तपास सीयआडीकडे हस्तांतरित करण्याची मागणी केली होती. उच्च न्यायालयाने ही मागणी मान्य करत तपास तहसील पोलिसांकडून काढून घेतला होता.
कुठल्याही तपास प्रक्रियेत पुरावे गोळा करणे महत्त्वपूर्ण बाब असते मात्र तहसील पोलिसांनी असे केले नसल्याचे दिसत आहे. फौजदारी गुन्ह्यांचा निष्पक्ष तपास हे पोलिसांचे कर्तव्य आहे. मात्र या प्रकरणात असे झाले नाही, असे निरीक्षण उच्च न्यायालयाने नोंदविले होते.
दरम्यान मालूचा जामीन रद्द करा, असा तहसील पोलिसांचा अर्ज सत्र न्यायालयापुढे प्रलंबित होता. यात तहसील पोलिसांच्या जागी सीआयडीचा उल्लेख करण्याचे आदेश न्यायालयाने अलीकडेच दिले. आज या प्रकरणी निकाल सुनावित सत्र न्यायालयाने सीआयडीचा अर्ज मान्य केला.
मद्यधुंद अवस्थेत गाडी चालवली
या प्रकरणी दोन प्रत्यक्ष साक्षीदार आहेत. रितू दारू पिऊन गाडी चालवित होते, असे पुरावे समोर आलेत. सीपी क्लबमधून निघताना ती गाडी चालवित असल्याचे सीसीटीव्हीवरून दिसून येत आहे. तिने अपघातानंतर पीडितांची मदत करण्याऐवजी तेथून पळ काढला होता. तिने तपास अधिकाऱ्यापुढे विरोधाभासी बयान केले आहे. यावरून ती खोटी माहिती देत असल्याचा संशय येतो. त्यामुळे या प्रकरणी तिची चौकशी करणे आवश्यक आहे.तसेच तिच्यावर असलेल्या आरोपींचे गांभीर्य लक्षात घेता तिने नियमित जामिनासाठी अर्ज केल्याशिवाय तिला समाजात मोकळे सोडता येणार नाही. तसे केल्यास ते न्यायसंगत (इट विल बी मिसकॅरिएज ऑफ जस्टिस) ठरणार नाही, असे निरीक्षण नोंदवित न्यायालयाने तिचा जामीन रद्द केला. तसेच तपास अधिकाऱ्याला तिला अटक करण्याची मुभा असल्याचे स्पष्ट केले.