दिल्लीच्या फतेहपूर बेरी परिसरात रात्री उशिरा एका व्यक्तीचा संशयास्पद परिस्थितीत मृत्यू झाला. तरुणाचा मृत्यू झाला त्यावेळी घरात शेकोटी पेटलेली होती. मृत तरुण बाऊन्सर होता. त्याचं नाव विनय अरोरा आहे. त्यानं आत्महत्या केली का याचा तपास पोलीस करत आहेत. विनयवर कर्ज होतं. त्यामुळे तो त्रस्त होता अशी माहिती तपासातून समोर आली आहे.
न्यू मंगलापुरीतील अंगणवाडी गल्लीत ही घटना घडली. रात्री साडे आठ वाजता पीसीआरला एक कॉल आला. एका घरात आग लागली असून त्यात एक तरुण जिवंत जळाल्याची माहिती पोलिसांना देण्यात आली. पोलीस घटनास्थळी पोहोचले. तेव्हा घरातील खुर्ची आणि कपडे जळाले होते. घरात शेकोटी होती. शेकोटीमुळेच तरुणाचा मृत्यू झाला असावा असा अंदाज पोलिसांनी वर्तवला. पोलिसांनी अग्निशमन दलाच्या पथकाला पाचारण केलं.
घटनेचा तपास पोलिसांकडून सुरू आहे. मृत तरुण अविवाहित होता. तो बाऊन्सर म्हणून काम करायचा. त्याच्यावर बरंच कर्ज झालं होत, अशी माहिती पोलीस चौकशीतून समोर आली आहे. हे प्रकरण आत्महत्येचं आहे का, याचा तपास पोलीस करत आहेत. पोलिसांनी तरुणाचा मृतदेह ताब्यात घेऊन तो शवविच्छेदनासाठी पाठवला. शवविच्छेदन अहवालातून मृत्यूचं नेमकं कारण स्पष्ट होऊ शकेल.