शिवसेना ( ठाकरे गट ) माजी नगरसेवक सुधीर मोरे आत्महत्येप्रकरणी वकील नीलिमा चव्हाण यांच्यावर गुन्हा दाखल केला आहे. नीलिमा चव्हाण यांनी अटकपूर्व जामिनासाठी मुंबई सत्र न्यायालयात धाव घेतली होती. पण, निलिमा चव्हाण यांचा अटकपूर्व जामीन न्यायालयाने फेटाळला आहे.
नीलिमा चव्हाण यांनी सुधीर मोरे यांना मानसिक त्रास दिल्याचा दावा पोलिसांनी न्यायालयात केला. त्यानंतर न्यायालयाने नीलिमा चव्हाण यांना जामीन फेटाळला.
रत्नागिरी जिल्हा संपर्क प्रमुख सुधीर सयाजी मोरे यांनी गुरूवारी ( ३१ ऑगस्ट ) घाटकोपर आणि विद्याविहारदरम्यान रेल्वेसमोर उडी मारून आत्महत्या केली होती. याप्रकरणी सुधीर मोरे यांच्या मुलाने नीलिमा चव्हाण यांनी वडिलांचा छळ केल्याचा आरोप करत रेल्वे पोलिसांत गुन्हा दाखल केला होता.
यानंतर अटकेच्या भीतीपोटी चव्हाण यांनी सोमवारी सत्र न्यायालयात अटकपूर्व जामिनासाठी धाव घेतली होती. वकील सुबीर सरकार यांच्यामार्फंत दाखल केलेल्या याचिकेत खोट्या प्रकरणात गोवण्यात आल्याचं चव्हाण यांनी म्हटलं.