एका कुटुंबाला घरात साप आढळून आल्याने एकच खळबळ उडाली. धारावीत ही धक्कादायक घटना घडली. १४ किलोपेक्षा जास्त वजनाची ११ फुटांची मादी इंडियन रॉक पायथनने घरातील पाळीव सश्याला फस्त केल्यानंतर घरातील रेफ्रिजरेटरच्या मागे तळ ठोकला होता.
रुक्साना शेख या महिलेच्या घरात हे अजगर आढळून आले. त्यांनी टाइम्सला दिलेल्या माहितीनुसार, पहाटे ३ च्या सुमारास तिच्या लहान मुलाला अजगर दिसला. तिने सांगितले की, विचित्र आवाज ऐकून मुलाला जाग आली आणि त्याने टॉर्च लाईट लावली. रात्रीच्या वेळी जेव्हा मुलाने घरात साप असल्याचे सांगितलं तेव्हा एकच गोंधळ माजला. शेख म्हणाल्या, “आमच्या दोन सशांपैकी एकाला या सापाने पकडल्याचे त्याच्या लक्षात आले तेव्हा आम्हाला आणखी दु:ख झालं”. थरथरत्या हातांनी त्यांच्यापैकी एकाने लांबून त्या अजगरचा एक व्हिडिओ शूट केला ज्यामध्ये अजगरचे फुगलेले पोट दिसत होते.
ज्या घरात हे अजगर सापडले त्या घराच्या अगदी मागून मिठी नदी वाहते, असे वन्यजीव प्राणी संरक्षण आणि बचाव संघटनेचे (वाप्रा) अतुल कांबळे यांनी सांगितले. ज्यांनी अजगराला घराबाहेर काढले ते म्हणाले, “घराच्या टिनच्या भिंतीतून साप आत शिरला असे दिसते.”
या अजगरला पकडण्यासाठी खूप मेहनत घ्यावी लागली. अजगर आक्रमक आणि हल्ला करण्याच्या मोडमध्ये होता, असे बचावकर्त्याने सांगितलं. वांद्रे-कुर्ला कॉम्प्लेक्समधील वन्यप्राण्यांची सुटका करणारे कांबळे म्हणाले, “हे नैसर्गिक आहे कारण त्याने नुकतेच आपल्या भक्ष्याला खाल्ले होते, म्हणून आम्ही खूप शांतपणे आणि सावधपणे त्याला पकडलं, कारण तो पुन्हा हल्ला करु शकत होता.”
डॉक्टर दीपा कात्याल ज्यांनी अजगराची तपासणी केली आणि त्याला सोडण्यासाठी तो तयार असल्याचं प्रमाणित केले त्यांनी कबूल केले की वैद्यकीय फिटनेस प्रमाणपत्राचा एक भाग म्हणून केलेल्या एक्स-रे काढताना त्याला सांभाळणं खूप कठीण जात होतं. डॉ. कात्याल म्हणाल्या, अजगराच्या पोटात भक्ष्य ताजे असल्याने, अजगर सुस्त होता.
शनिवारी सायंकाळी वनविभागाच्या अधिकाऱ्यांच्या उपस्थितीत अजगराला सोडण्यात येणार होते. मात्र, शेख यांच्या धारावीच्या घरी दुपारनंतरही दहशतीचे वातावरण होते. फक्त मुलंच नाही तर आम्ही सगळे घाबरलो आहोत, असं रुक्साना शेख यांनी सांगितलं. पहाटे ३ च्या सुमारास साप दिसला तेव्हापासून कोणाच्याही डोळ्याला झोप नव्हती, असंही त्यांनी सांगितलं. इतकंच नाही तर, माझ्या धाकट्या मुलाने घरात जाण्यासही नकार दिला आणि ते शाळेतही गेले नाही.