महापालिकेच्या ‘प्रभारीराज’मध्ये घेतलेले वादग्रस्त निर्णय फिरवण्यास नूतन आयुक्त डॉ. अशोक करंजकर यांनी सुरुवात केली आहे. अवैध गर्भलिंग निदान प्रकरणात खटला दाखल असतानाही वैद्यकीय अधीक्षकपदी केलेली डॉ. राजेंद्र भंडारी यांची नियुक्ती डॉ. करंजकर यांनी अवैध ठरवत त्यांच्या जागी डॉ. नितीन रावते यांची नियुक्ती केली आहे. तसेच उद्यान विभागाचे अनधिकृतपणे उपायुक्त विजयकुमार मुंडेंकडे सोपवलेले नियंत्रणही आयुक्तांनी चुकीचे ठरवले आहे. प्रभारी आयुक्तपदाच्या कार्यकाळात स्वत:चे अधिकार वाढविण्याबाबत भाग्यश्री बानायत यांनी काढलेला आदेशही आयुक्तांनी रद्द केला आहे. बानायत यांनी काढलेले तीन आदेश आयुक्तांनी एकाच दिवशी फिरवले आहेत.
डॉ. चंद्रकांत पुलकुंडवार यांच्या बदलीनंतर महापालिकेचा कारभार मागील पावणेदोन महिने प्रभारी आयुक्तांकडे होता. यात विभागीय आयुक्त राधाकृष्ण गमे, तत्कालीन जिल्हाधिकारी गंगाथरन डी. आणि अतिरिक्त आयुक्त भाग्यश्री बानायत यांचा समावेश होता. २१ जुलै रोजी डॉ. करंजकर यांची पूर्णवेळ आयुक्त म्हणून नियुक्ती करण्यात आली. आता बुधवारी एकाच दिवशी करंजकर यांनी तीन महत्त्वपूर्ण निर्णय फिरवत प्रशासकीय शिस्तीचे दर्शन घडवले. महापालिकेत प्रभारी प्रशासक असताना पारित झालेले सर्व निर्णय व संचिकांची तपासणी आयुक्त डॉ. करंजकर यांनी सुरू केली आहे. विविध विभागांच्या जवळपास साडेतीनशे फाइल्सचा अभ्यास करून, ज्या आदेशांमध्ये त्रुटी व चुका आहेत, त्याच केवळ रद्द केले जातील, असे आयुक्त करंजकर यांनी स्पष्ट केले. ज्या नियमानुसार मंजूर असतील, त्यात बदल होणार नाही, असेही त्यांनी स्पष्ट केले आहे.
११ जुलै रोजी महापालिकेचे नियमित वैद्यकीय अधीक्षक डॉ. बापूसाहेब नागरगोजे यांची नगर येथे बदली झाली. त्यानंतर दहा दिवस वैद्यकीय अधीक्षक पदाचा प्रभार नियमित अधिकाऱ्याकडे दिला गेला नव्हता. शुक्रवारी नियमित आयुक्त म्हणून डॉ. करंजकर यांची नियुक्ती झाल्यानंतर घाईगडबडीत वादग्रस्त डॉ. भंडारींची वैद्यकीय अधीक्षकपदी नियुक्ती करण्यात आली. नाशिकरोड येथील खासगी रुग्णालयात अवैध सोनोग्राफी मशीन व अन्य विविध मुद्यांवरून डॉ. भंडारींसह ११ डॉक्टरांवर महापालिकेने गुन्हा दाखल करून चौकशी सुरू केली असून, प्रकरण न्यायप्रविष्ट असल्याने डॉ. भंडारींची नियुक्ती वादात सापडली होती. करंजकर यांनी ही नियुक्ती अवैध ठरवत, या पदावर आता डॉ. नितीन रावते यांनी नियुक्ती केली आहे.
गेल्या ६ जुलै रोजी उद्यान विभागाचे नियमित अधीक्षक म्हणून विवेक भदाणे यांची नियुक्ती झाली. यापूर्वी उद्यान अधीक्षकपद रिक्त असल्यामुळे डॉ. मुंडे यांच्याकडे विभागाचा पदभार होता. नियमित उद्यान अधीक्षक रुजू झाल्यामुळे मुंडे यांचा पदभार काढला गेला होता. त्यांच्याकडे गोदावरी संवर्धन विभागाची जबाबदारी होती. परंतु, पुन्हा उद्यान विभागाची एक महिन्याकरिता पर्यवेक्षणाची जबाबदारी मुंडे यांच्याकडे दिल्याने शंका उपस्थित झाल्या होत्या. डॉ. करंजकर यांनी सदरचा आदेश रद्द केला आहे.महापालिकेच्या कामकाजाच्या दृष्टीने आयुक्तांकडून अतिरिक्त आयुक्त सेवा, शहर असे दोन विभाग करून कामाचे वाटप केले जाते. प्रशासन, नगररचना, ड्रेनेज, माहिती तंत्रज्ञान, पाणीपुरवठा, गुणनियंत्रण असे विभाग थेट आयुक्तांकडे असतात. परंतु, प्रभारीपद असताना बानायत यांनी आयुक्तांच्या आदेशात बदल करीत, या विभागाच्या संचिकाही त्यांच्या विभागामार्फतच आयुक्तांकडे पाठविण्याचा आदेश काढत, स्वत:च्या अधिकारात वाढ केली होती. परंतु, डॉ. करंजकर यांनी पदभार घेतल्यानंतर सदरचा आदेशही रद्द केला आहे.
माझ्या प्रभारी आयुक्तपदाच्या कार्यकाळात मी जे काही निर्णय घेतले, ते नियम पाहून आणि परिस्थितीची निकड पाहून घेतले होते. त्यामुळे नियमित आयुक्तांनी मी घेतलेल्या निर्णयाबाबत काय निर्णय घ्यावा, हा त्यांचा निर्णय आहे.