ऑनलाइन व्हिडीओ रेटिंगच्या काही तासांच्या कामासाठी दीड हजार ते चार हजार रुपये पगार देण्याचे प्रलोभन दाखवून सायबर चोरांनी कल्याणमधील एका व्यक्तीला तब्बल १ कोटी २३ लाख रुपयांचा गंडा घातल्याचा प्रकार समोर आला आहे. आरोपींनी या व्यक्तीला वेगवेगळ्या बँक खात्यामध्ये पैसे भरण्यास सांगून त्यांचे संपूर्ण बँक खातेच रिकामे केले आहे. या फसवणुकीप्रकरणी महात्मा फुले चौक पोलिस ठाण्यात गुन्हा दाखल झाला आहे.
कल्याणमधील ५८ वर्षांचे एक गृहस्थ खासगी कंपनीतील नोकरीनंतर सध्या घरीच असतात. त्यांना टेलिग्राम आयडीवर ऑनलाइन व्हिडीओ रेटिंग करण्याच्या कामाचा मेसेज आला. त्यांना एक ते तीन तासासाठी दीड हजार ते २ हजार ८०० रुपये आणि तीन ते पाच तासांच्या कामासाठी २ हजार ८०० ते चार हजार रुपये मिळणार होते. आरोपींनी त्यांना एक लिंक आणि कोड नंबर पाठवला. या लिंकवर क्लिक केल्यानंतर एक संकेतस्थळ उघडले. त्यावर व्हिडिओ रेटिंग करायचे असल्याने त्यांनी त्या लिंकवरील पोर्टलवर बँक खात्यासह अन्य माहिती भरली. त्याच दिवशी पोर्टलवर १० हजार ९०० रुपयांचा बोनस मिळाल्यानंतर त्यांनी काही रेटिंग दिले.
या कामाचे त्यांना ७०० रुपये मिळाले. नंतर त्यांना टास्क देण्यात आला. तसेच, १० हजार ९०० रुपये भरण्यास सांगितले. त्यांनी नकार देताच सर्वजण अशाच पद्धतीने पैसे भरतात. नंतर चांगला फायदा होतो. तुम्हालादेखील १४ हजार रुपये मिळतील, असे आश्वासन मिळाल्याने या गृहस्थाने ही रक्कम भरली. पहिला टास्क पूर्ण झाल्याचे सांगून आरोपींनी त्यांना पुन्हा ३० तिकिटांवर एक ते चार लग्झरी तिकिटे मिळत असल्याची माहिती दिली.
यानंतर आरोपींनीलग्झरी तिकीट लागले असून अनामत रक्कम भरल्यावरच तुमची रक्कम रिलीज होईल, असे सांगितले. ते अनामत रक्कम भरत होते, तेव्हा त्यांना काही तिकिटे मिळत होती. मात्र, त्यांची अनामत रक्कम थांबवली जात होती. ती रिलीज करण्यासाठी पुन्हा अनामत रक्कम भरावी लागत होती. अशा प्रकारे आरोपींनी या गृहस्थाकडून १ कोटी २३ लाख १२ हजार रुपये उकळले असून मूळ रक्कम आणि व्याज अशी एकूण १ कोटी ५६ लाख रुपये काढण्यासाठी त्यांनी प्रयत्न केले. परंतु, त्यासाठी ९३ लाख ७६ हजार रुपये कर भरण्याविषयी सांगण्यात आले. फसवणूक झाल्याचे लक्षात येताच त्यांनी महात्मा फुलै चौक पोलिस ठाण्यात धाव घेत तक्रार केली.