कोकणात चिपळूण तालुक्यातील शिरगाव येथील वाशिष्ठी नदीतील कुंभार्ली स्मशानभूमी जवळ असलेल्या वझर याठिकाणी आठ मुले पोहण्यासाठी गेली होती. तेथील डोहात चिपळूण मधील आतीक बेबल आणि अब्दुल कादिर लसने ही दोन मुले बुडाली, तर इतर सहा जण सुदैवाने बचावली आहेत. घटनास्थळी तात्काळ सर्च ऑपरेशन सुरू करण्यात आलं होतं. मात्र, रात्री ही मोहीम थांबवण्यात आली होती.
सोमवारी सकाळी महाड येथील साळुंखे रेस्क्यू टीम, खंडाळा येथील स्क्युबा ड्रायव्हिंग रेस्क्यू टीम, कोस्टगार्ड आणि स्थानिक यांच्याकडून सर्च ऑपरेशन सुरू होते. अखेर काल सोमवारी सायंकाळी उशिरा पाच वाजण्याच्या दरम्यान दोघांचेही मृतदेह मिळाले आहेत. या दोन्ही मुलांचे मृतदेह शिरगाव आरोग्य केंद्राच्या पुलाजवळ मिळाले आहेत.चिपळूण तालुका प्रशासन आणि जिल्हा प्रशासनाकडून या ठिकाणी सोमवारी सकाळपासून पुन्हा तात्काळ सगळ्या अद्ययावत यंत्रणा लावून सर्च ऑपरेशन सुरू करण्यात आले होते. या घटनेची माहिती मिळताच चिपळूणचे आमदार शेखर निकम आणि गुहागरचे आमदार भास्कर जाधव यांनी घटनास्थळी भेट देऊन प्रशासनाला योग्य त्या सूचना दिल्या होत्या.
चिपळूण शहर परिसरातील आठ मुले या धोकादायक असलेल्या डोहात रविवारी सायंकाळी पोहोण्यासाठी आले होते. चार वाजण्याच्या सुमारास शिरगाव येथे फिरण्यासाठी आले होते. त्यानंतर ते पोहण्यासाठी या डोहापर्यंत पोहोचले होते. त्यामध्ये इब्राहिम काजोरकर गोवळकोट, अब्रार हुसेन आंचरेकर गोवळकोट, फरहान हिदायत पिलपिले खाटीक अली, अली नियाज सनगे, जहिद हनीफ खान, आरमान अजीज खान, आतीक इरफान बेबल, अब्दुल कादीर नोशाद लासने असे आठ मुले दुचाकी घेऊन फिरण्यासाठी आले होते. मात्र, सुदैवाने त्यांच्यापैखी सहा जण जोरदार पाऊस सुरू झाल्याने एका झोपडीजवळ आसऱ्यासाठी थांबले होते. याचवेळी दोघांनी या डोहात जाऊन उडी मारली आणि हीच ऊडी या दोघांच्याही जीवावर बेतली आहे.दरम्यान, याच धोकादायक असलेल्या डोहात यापूर्वीही तीन ते चार जणांचे जीव गेले आहेत. अशी माहिती स्थानिक ग्रामस्थांनी दिली आहे. या घटनेची माहिती मिळताच परिसरातील ग्रामस्थ, चिपळूणचे प्रांताधिकारी आकाश लीगाडे, चिपळूण डी.वाय.एस.पी. राजेंद्र राजमाने, चिपळूण तहसीलदार प्रवीण लोकरे, शिरगाव पोलीस ठाण्याचे निरीक्षक सुजित गडदे, शिकून नगरपरिषद मुख्याधिकारी प्रसाद शिंगटे यांनी घटनास्थळी धाव घेऊन रात्री लाईटच्या साह्याने सर्च ऑपरेशन सुरू केलं होतं.
पाण्याचा डोह हा खूप खोल आहे आणि पाण्याचा प्रवाह मोठा असल्याने अखेर रायगड जिल्ह्यातून रेस्क्यू टीमची मदत घेण्याचं ठरलं. तसेच या पाण्याच्या प्रवाहाला थांबवून हे पाणी अन्यत्र वळवण्यात आलं आणि या डोहाजवळ येत असलेला पाण्याचा फोर्स बंद करण्यात आला. त्यानंतर या डोहात कॅमेरे सोडूनही या दोघांचा शोध घेण्यात आला होता. मात्र, तरीही अपयश आल्याने मोठा प्रश्न निर्माण झाला होता.
आतीक बेबल आणि अब्दुल कादिर लसणे दोघेही इयत्ता दहावीत शिक्षण घेत होते. या दोन्हीही विद्यार्थ्यांच्या अशा धक्कादायक मृत्यूमुळे परिसरातून हळहळ व्यक्त होत आहे. या घटनेची माहिती मिळताच चिपळूण मधील अनेक बांधवांनी शिरगाव येथे धाव घेतली होती. आपत्कालीन यंत्रणेच्या सगळ्या अद्ययावत सुविधा वापरूनही अनेक तास या सर्च मोहिमेला यश येत नव्हतं. त्यामुळे प्रशासनासमोरही मोठे आव्हान निर्माण झालं होतं. अखेर सोमवारी सायंकाळी पाचच्या सुमारास या सर्च ऑपरेशनला हे मृतदेह शोधण्यात यश आलं.
दरम्यान, आता धोकादायक असलेल्या या डोहाच्या ठिकाणी प्रशासनाकडून सूचनांचे फलक लावून हा डोह पर्यटकांसाठी तात्काळ बंद करण्यात, यावा अशी मागणी आता करण्यात आली आहे. यापूर्वीही अशा घटना घडल्याने प्रशासनाने यापूर्वीच ही खबरदारी घेणे आवश्यक होतं, अशीही प्रतिक्रिया आता स्थानिक ग्रामस्थांकडून व्यक्त केली जात आहे.