बदलापूरमध्ये धक्कादायक आणि डॉक्टरी पेशाला काळीमा फासणारी घटना घडली आहे. बदलापूर पश्चिममधील मांजर्ली परिसरात राहणाऱ्या एका २३ वर्षीय गतिमंद तरुणीला डॉक्टराने आपल्या क्लिनिकमध्ये बोलवून तिच्यावर लैंगिक अत्याचार केला. ही बाब तिच्या बहिणीला समजताच तिने पोलीस स्थानकात गाठले आणि त्या डॉक्टर विरोधात तक्रार दाखल केली. पोलिसांनी गुन्हा दाखल करत विकृत आरोपी डॉक्टरला अटक केली आहे.
बदलापूर पश्चिम भागातील मांजर्ली गावातील दिपाली पार्कजवळ नवश्री साईकृपा सोसायटीत आरोपी डॉक्टर हेमंत सोनवणे याचे क्लिनिक आहे. या क्लिनिक परिसरातून जाणाऱ्या एका गतिमंद पीडित तरुणीला डॉक्टरने आत बोलावलं. आणि ती एकटी असल्याचा गैरफायदा घेत क्लिनिकमध्येच तिच्यावर लैंगिक अत्याचार केला.पीडित तरुणीला तिच्या बहिणीने ९ जुलैला दुपारच्या सुमारास घरातील साहित्य आणि मसाला आणण्यासाठी जवळील किराणा दुकानात पाठवलं होतं. मात्र याच परिसरात असणारा डॉ. हेमंत याने त्याच्या क्लिनिकमध्ये या पीडित तरुणीला बोलावले आणि तिथेच तिच्यावर जबरदस्ती केली. आणि तिच्यावर लैंगिक अत्याचार केला. यावेळी आपली बहीण इतका वेळ कुठे राहिली? याचा शोध घेण्यासाठी बहीण बाहेर पडली. तिने शोधाशोध केली. दरम्यान, याचवेळी क्लिनिकच्या बाहेर तिला बहिणीची चप्पल दिसल्याने पीडित तरुणीची बहीण क्लिनिकमध्ये शिरली. यावेळी क्लिनिकमध्ये डॉ. हेमंत तिच्यावर अत्याचार करत असल्याचे दिसले आणि तिने आपल्या बहिणीची सुटका केली. नंतर बहिणीने थेट बदलापूर पश्चिम पोलिसांना याबाबतची माहिती दिली. घटनास्थळी पोलीस दाखल झाले. आणि त्यांनी डॉक्टरला ताब्यात घेत त्याच्यावर गुन्हा दाखल केला आणि अटक केली. याबाबत अधिक तपास सुरू असल्याची माहिती यावेळी वरिष्ठ पोलीस निरीक्षक अरूण क्षीरसागर यांनी दिली आहे.