मराठी चित्रपट सृष्टीतील ज्येष्ठ अभिनेत्री शांता तांबे यांचे सोमवारी (१९ जून २०२३ रोजी) निधन झाले. वयाच्या ९० व्या वर्षी त्यांनी अखेरचा श्वास घेतला. वृद्धापकाळाने त्यांचे निधन झाले. शांता यांनी सुरूवातीला नाटकात काम करून अभिनयक्षेत्रात पदार्पण केले होते. आपल्या अभिनय कारकिर्दीत त्यांनी भालजी पेंढारकर, दिनकर पाटील, अनंत माने आदी ख्यातनाम दिग्दर्शकांसोबत काम केले. शांता तांबे यांच्या निधनाने मराठी चित्रपटसृष्टीवर शोककळा पसरली.
मोहित्यांची मंजुळा’, ‘सवाल माझा ऐका’, ‘मोलकरीण’, ‘मर्दानी’, ‘बाई मोठी भाग्याची’ अशा अनेक चित्रपटांमध्ये त्यांनी काम केले. या सिनेमातील त्यांच्या सहाय्यक भूमिका लक्षात राहणाऱ्या आहेत. ‘दोन बायका फजिती ऐका’, ‘चांडाळ चौकडी’, ‘असला नवरा नको गं बाई’, ‘सोंगाड्या’, ‘चंदनाची चोळी’ या चित्रपटांमध्येही त्या दिसल्या. घरच्या परिस्थितीमुळे त्यांना चित्रपट क्षेत्रात पाऊल ठेवावे लागलेले. घरची परिस्थिती प्रतिकूल असल्याने चित्रपटांमध्ये काम करण्याचे ठरवले, असे त्यांनी अनेक मुलाखतींमध्ये सांगितले होते.