डोंगरी येथील एका कपड्याच्या व्यापाऱ्याला त्याच्या भावाचे नाव अमली पदार्थविरोधी पथकाच्या तपासामध्ये पुढे आल्याचे सांगण्यात आले. या गुन्ह्यात आरोपी न करण्यासाठी तसेच अटक टाळण्यासाठी त्याच्याकडून २२ लाख रुपये उकळण्यात आले. मात्र तो केवळ बनाव असून निलंबित पोलिसांचा हा कारनामा असल्याचे व्यापाऱ्याच्या लक्षात आले. या संदर्भात तक्रार करताच अमली पदार्थविरोधी पथकाचा अधिकारी असल्याचे सांगणारा निलंबित पोलिस कॉन्स्टेबल आणि त्याचा साथीदार यांच्याविरुद्ध डोंगरी पोलिस ठाण्यात गुन्हा दाखल करण्यात आला आहे.
डोंगरी येथील हुसेन बटाटावाला यांचा कपड्याचा व्यवसाय आहे. पोलिसांचा खबरी म्हणून काम करणाऱ्या नावेद परमार याच्यासोबत हुसेन यांची ओळख झाली होती. मार्चमध्ये नावेद हा हुसेन यांच्या घरी आला आणि हुसेन यांचा मोठा भाऊ आसिफ याच्याबाबत धक्कादायक माहिती दिली. वांद्रे येथील अमली पदार्थविरोधी पथकाच्या एका तपासामध्ये आसिफ याचे नाव आले आहे. याप्रकरणात पथकामधील चंद्रकांत गवारे हे अधिकारी ओळखीचे असून ते आपल्याला मदत करू शकतील, असे नावेदने सांगितले. यावर विचार करून सांगतो, असे हुसेन यांनी सांगितले. मात्र आसिफ याला बाहेर काढले नाही तर कुटुंबातील इतरांची नावेही आरोपींच्या यादीत टाकली जातील, असेही नावेद म्हणाला. त्यामुळे हुसेन यांनी गवारे यांना भेटण्याची तयारी दर्शवली. या भेटीत असिफला ड्रग्जच्या गुन्ह्यातून बाहेर काढण्यासाठी ३५ लाख रुपये आणि दोन अॅपल फोनची मागणी गवारे यांनी केली.हुसेन यांनी इतकी रक्कम देऊ शकत नाही, असे सांगितले. त्यावेळी गवारे यांनी संपूर्ण कुटुंबाला आतमध्ये टाकण्याची धमकी दिली. तसेच आसिफ याला कमीत कमी १० वर्षांची शिक्षा होईल, असे सांगितले. त्यामुळे हुसेन यांनी २२ लाख आणि एक मोबाइल फोन देण्याची तयारी दर्शवली. त्यापैकी १४ लाख रुपये हुसेन यांनी आधी देताच गवारे आणि परमार यांनी गुन्ह्यातून नाव काढल्याचे अमली पदार्थविरोधी पथकाचे पत्र दिले. हे पत्र मिळताच हुसेन यांनी उर्वरित रक्कम दिली.
गुन्ह्यातून बाहेर काढल्याचे अमली पदार्थविरोधी पथकाचे पत्र आपल्या वकिलास दाखविले. यावर न्यायालयाचा स्टॅम्प नसल्याने वकिलास संशय आला. त्यामुळे हुसेन यांनी चौकशी केली असता ते पत्र बनावट असल्याचे कळले. गवारे हे निलंबित पोलिस असून ते अशाप्रकारे लोकांकडून पैसे उकळत असल्याचे समजले. हे लक्षात आल्यानंतर त्यांनी डोंगरी पोलिस ठाण्यात तक्रार केली.