पुणे लोहमार्ग पोलिसांनी विविध कारवाईत जप्त केलेला, तसेच न्यायालयाने निकाली काढलेल्या प्रकरणातील तब्बल एक हजार किलो गांजा आणि सात किलो ८९६ ग्रॅम चरस पोलिसांनी नष्ट केला. लोहमार्ग पोलिसांनी नष्ट केलेल्या अमली पदार्थांची एकूण किंमत सव्वासहा कोटीं रुपये एवढी आहे.
लोहमार्ग पोलिसांकडून गांजा, चरससह अन्य अंमली पदार्थांची वाहतूक तसेच विक्री करणाऱ्यांवर कारवाई करण्यात आली होती. पुणे, दौंड, कुर्डुवाडी आणि सोलापूर लोहमार्ग पोलीस ठाण्यातील पथकांकडून १९९२ पासून आतापयर्यंत अमली पदार्थांच्या कारवाईमध्ये एकूण ४७ गुन्ह्यांमध्ये एक हजार ५०० किलो गांजा आणि चरस असे अमली पदार्थ जप्त करण्यात आले होते. त्यापैकी २९ गुन्ह्यातील गांजा आणि चरस असे अमली पदार्थ लोहमार्ग न्यायालयाने दिले होते. त्यानुसार पुणे लोहमार्ग पोलीस अधीक्षक श्रीकांत धिवरे, उपअधीक्षक चंद्रकांत भोसले, वरिष्ठ पोलीस निरीक्षक इरफान शेख यांच्या समितीने खडकी मुख्यालय येथे अमली पदार्थांचा पंचनामा केला.
लोहमार्ग पोलिसांनी अमली पदार्थ रासायनिक विश्लेषण तज्ज्ञ, प्रदूषण नियंत्रण महामंडळातील अधिकारी, शासकीय वजन-मापन विभागातील अधिकाऱ्यांच्या समक्ष अमली पदार्थांचे वजन करून तो नष्ट केला. पोलीस निरीक्षक राजेंद्र गायकवाड, संतोष गायकवाड, सहायक निरीक्षक युवराज कलगुटगे, अमोल गवळी आदी उपस्थित होते.