ठाणे खाडीत भांडुप पम्पिंग स्टेशनच्या हद्दीत एका सोनेरी कोल्ह्याचा मृतदेह आढळला. मासेमारी करण्यासाठी गेलेल्या मासेमारांना रविवारी सकाळी हा मृत कोल्हा दिसला. याबाबतची माहिती त्यांनी पर्यावरणप्रेमी आणि वन विभागाच्या अधिकाऱ्यांना दिली. त्यानुसार वन विभागाच्या अधिकाऱ्यांनी ऐरोलीतील फ्लेमिंगो पक्षी अभयारण्यात कोल्ह्याचा मृतदेह पाठवला असून शवविच्छेदनानंतर मृत्यूचे कारण समोर येणार आहे. या कोल्ह्याच्या अंगावर कोणत्याही जखमा आढळून आलेल्या नाहीत. त्यामुळे वयोमानानुसार त्याचा मृत्यू झाल्याचा प्राथमिक अंदाज अधिकाऱ्यांनी वर्तवला.
ठाणे खाडीला रामसर स्थळाचा दर्जा देण्यात आला आहे. येथे विविध प्रकारचे पक्षी, प्राणी पाहायला मिळतात. सोनेरी कोल्ह्याचे दर्शन अनेकदा होते. ठाण्यापासून नवी मुंबईतील खारघरपर्यंतच्या खारफुटीच्या वनात कोल्हे दिसले आहेत. गेल्या वर्षभरापूर्वी ऐरोली भागात खाडीलगत असलेल्या एका मोकळ्या विहिरीत कोल्हा आढळला होता. त्याची वन विभागाच्या अधिकाऱ्यांनी सुटका केली. त्याच्यावर उपचार करून त्याला पुन्हा त्याच्या अधिवासात सोडून दिले होते. रविवारी मासेमारी करण्यासाठी गेलेल्या काही स्थानिक मासेमारांना कोल्हा मृतावस्थेत आढळला. याची माहिती त्यांनी पर्यावरणप्रेमी नंदकुमार पवार यांना दिली. त्यांनी प्रत्यक्षात जाऊन पाहणी केली. वन विभागाच्या अधिकाऱ्यांना याबाबत कल्पना दिली. पवार यांनी मच्छिमारांसोबत जाऊन कोल्ह्याला एका थर्मोकोल बॉक्समध्ये टाकून खाडीकिनारी आणले.