महाराष्ट्राचे माजी मुख्यमंत्री मनोहर जोशी यांना सोमवारी संध्याकाळी अस्वस्थ वाटू लागल्याने तातडीने माहीम येथील हिंदुजा रुग्णालयात दाखल करण्यात आले होते. त्यानंतर डॉक्टरांच्या तपासणीदरम्यान त्यांना ब्रेन ट्युमर असल्याचे निदान करण्यात आले. त्यांच्यावर उपचार करणाऱ्या डॉक्टरांनी जोशी हे अर्धबेशुद्ध अवस्थेत असून त्यांची प्रकृती स्थिर आहे. तसेच त्यांना व्हेंटिलेटरची गरज लागली नाही, असे सांगितले. सध्या त्यांना अतिदक्षता विभागात ठेवण्यात आले आहे. वरिष्ठ मेंदूविकार तज्ज्ञांच्या देखरेखीखाली त्यांच्यावर उपचार करण्यात येत असल्याचे सांगण्यात आले.मनोहर जोशी यांना सोमवारी संध्याकाळी अस्वस्थ वाटत असल्याने तातडीने माहीम येथील हिंदुजा रुग्णालयात दाखल करण्यात आले होते. डॉ. चारुलता संकला यांच्या नेतृत्त्वाखालील डॉक्टरांच्या पथकाने त्यांच्यावर तातडीने उपचार सुरु केले होते. जोशी यांना रुग्णालयात दाखल करण्यात आले तेव्हा ते काहीप्रमाणात कोमाच्या (सेमी कोमा) अवस्थेत गेले होते. मात्र, काहीवेळ उपचार झाल्यानंतर त्यांची प्रकृती स्थिर झाली. यानंतर मंगळवारी उद्धव ठाकरे आणि रश्मी ठाकरे यांनी हिंदुजा रुग्णालयात जाऊन मनोहर जोशी यांच्या तब्येतीची विचारपूस केली होती.
दरम्यान, डॉक्टरांकडून मनोहर जोशी यांच्या काही वैद्यकीय चाचण्या केल्या जाणार आहेत. जेणेकरून उपचारांची पुढील दिशा निश्चित करता येईल. मनोहर जोशी यांच्या मेंदूत असलेला ट्युमर हा कमी वेगाने वाढणारा आहे की जास्त वेगाने वाढणारा आहे, हे तपासले जाईल. मनोहर जोशी यांची प्रकृती स्थिर असली तरी ते अद्याप पुरेशा शुद्धीत नाहीत. तसेच त्यांच्या प्रकृतीला असलेला धोका पूर्पणपणे टळलेला नाही, असे डॉक्टरांकडून सांगण्यात आले.
मनोहर जोशी हे दिवंगत शिवसेनाप्रमुख बाळासाहेब ठाकरे यांच्या खास मर्जीतील नेते म्हणून ओळखले जात होते. मनोहर जोशी यांनी १९९५ ते १९९९ या काळात शिवसेना-भाजप युती सरकारमध्ये मुख्यमंत्री म्हणून पदभार सांभाळला होता. तसेच २००२ ते २००४ या काळात मनोहर जोशी यांनी लोकसभेचे अध्यक्ष म्हणूनही काम सांभाळले होते. महाराष्ट्राच्या राजकीय वर्तुळात मनोहर जोशी यांना ‘जोशी सर’ या टोपणनावाने ओळखले जाते. सत्तरीच्या दशकात मनोहर जोशी यांनी शिवसेनेचा एक साधा कार्यकर्ता म्हणून कामाला सुरुवात केली. १९७६-७७ मध्ये मनोहर जोशी मुंबईचे महापौर होते. १९९५ साली ते मुख्यमंत्री झाले. यानंतर मनोहर जोशी हे मध्य मुंबई लोकसभा मतदारसंघातून निवडून संसदेत गेले. त्यांनी केंद्रीय अवजड उद्योग मंत्रीपदाची धुरा सांभाळली होती. यानंतर ते सहा वर्षे राज्यसभेचे खासदार राहिले होते.