जायकवाडी पाटबंधारे विभागाचे निवृत्त कार्यकारी अभियंता शेख निजाम शेख नन्हुमियाँ यांच्या पत्नी हजराबी शेख निजाम आणि शकीलाबी शेख निजाम या दोघींना पेन्शन विभागून देण्याचा आदेश पारीत केला आहे. महाराष्ट्र प्रशासकीय प्राधिकरणाच्या छत्रपती संभाजीनगर येथील खंडपीठाचे उपाध्यक्ष पी. आर. बोरा यांनी हा आदेश दिला.
शेख निजाम यांनी सरकारी सेवेत असताना दिलेल्या कुटुंबाच्या तपशिलात पहिली पत्नी हजराबी आणि दुसरी पत्नी शकीलाबी यांचे नाव होते. २०१६मध्ये निवृत्त झाल्यानंतर त्यांना पेन्शन सुरू झाले. त्यांचे २०२१मध्ये निधन झाले. मात्र, निवृत्तीच्या वेळी त्यांनी पेन्शन प्रस्तावात फक्त दुसरी पत्नी शकीलाबी हिचा उल्लेख नामनिर्देशित सदस्य म्हणून केला होता. पहिली पत्नी हजराबी यांचे नाव वगळले होते. हजराबी यांनी पतीच्या मृत्यूनंतर निवृत्तीवेतनातील ५० टक्के रक्कम देण्याबाबत वरिष्ठ कोषागार कार्यालयात अर्ज केला होता. अर्जाचा विचार झाला नसल्याने त्यांनी अॅड. रवींद्र गोरे यांच्यामार्फत महाराष्ट्र प्रशासकीय प्राधिकरणाच्या (मॅट) खंडपीठात याचिका दाखल केली. महाराष्ट्र नागरी सेवा पेन्शन नियम १९८२ चे नियम ११६ (६)नुसार कौटुंबिक निवृत्तीवेतन एकापेक्षा जास्त विधवा असतील, तर त्यांना विभागून देता येईल असा नियम आहे, असा युक्तिवाद करण्यात आला.