कुस्तीसारख्या देशी खेळाला प्रोत्साहन देण्याच्या दृष्टीने ‘महाराष्ट्र राज्य कुस्तीगीर परिषद, पुणे’ यांच्या मान्यतेने आणि ठाणे जिल्हा तालीम संघाच्या सहकार्याने येत्या २५ व २६ फेब्रुवारी या दोन दिवशी नवी मुंबईकरांना कुस्तीचा थरार अनुभवता येणार आहे. कोपरखैरणे येथील सेक्टर ७मधील नवी मुंबई महापालिकेच्या शाळेच्या मैदानावर ‘नवी मुंबई महानगरपालिका केसरी राज्यस्तरीय व जिल्हास्तरीय कुस्ती स्पर्धा’ आयोजित करण्यात आली आहे. शनिवार, २५ फेब्रुवारी रोजी सायं ४ वाजता या स्पर्धेचा शुभारंभ होणार असून रविवार, २६ फेब्रुवारी रोजी रात्री साडेसात वाजता पारितोषिक वितरण सोहळा होणार आहे.
स्पर्धेमध्ये राज्यस्तरावर ७४ ते १०० किलो वजनी गटासाठी एक लाख रकमेचे प्रथम, तर ६० हजार, ४० हजार व ३० हजार रुपये अशा रकमेची अनुक्रमे द्वितीय, तृतीय व चतुर्थ पारितोषिके प्रदान केली जाणार आहेत. तर, ५५ ते ६५ किलो वजनी गटात २१ हजार, ११ हजार, सात हजार, पाच हजार अशी अनुक्रमे प्रथम, द्वितीय, तृतीय आणि चतुर्थ क्रमांकाची पारितोषिके दिली जाणार आहेत. ६५ ते ७३ किलो वजनी गटात २५ हजार, ११ हजार, सात हजार व पाच हजार रुपये अशा रकमेची अनुक्रमे द्वितीय, तृतीय आणि चतुर्थ पारितोषिके दिली जातील. ५५ ते ६० किलो कोकण विभागीय स्तरगटात ११ हजार, सात हजार, पाच हजार आणि तीन हजार रुपयांची अनुक्रमे प्रथम, द्वितीय, तृतीय आणि चतुर्थ क्रमांकाची पारितोषिके दिली जाणार आहेत.
महिलांचाही फड रंगणार
महिलांसाठीही विशेष कुस्ती स्पर्धा होत असून त्यामध्ये ५५ ते ६५ किलो महिला वजनी गटात राज्यस्तरीय स्पर्धेत ११ हजार रकमेचे पारितोषिक दिले जाणार आहे. त्यानंतर द्वितीय पारितोषिक ७ हजार, तृतीय पारितोषिक ५ हजार व चतुर्थ पारितोषिक ३ हजार रोख रकमेचे असेल. याच गटात कोकण विभागीय स्तरावरील ५० ते ५५ किलो वजनी गटात ७ हजारांचे प्रथम, ५ हजारांचे द्वितीय, तीन हजारांचे तृतीय आणि दोन हजारांचे चतुर्थ क्रमांकाचे पारितोषिक दिले जाईल.