महिलेला शरीरविक्रय करण्यास प्रवृत्त करून त्यातून मिळणाऱ्या उत्पन्नावर स्वतःची उपजीविका करत घरातच कुंटणखाना चालवणाऱ्या एका महिलेला ठाणे सत्र न्यायालायने पिटा कायद्याअंतर्गत तीन वर्षांची सक्तमजुरीची शिक्षा आणि एक हजार रुपये दंड ठोठावला आहे. तर, अन्य एका पिटा कलमाअंतर्गत या महिलेला न्यायालयाने एक वर्षाची शिक्षा सुनावणी आहे. याच प्रकरणात अन्य एका महिलेची निर्दोष सुटका झाली.
महिला आणि मुलींना एका घरामध्ये ठेवून त्यांना एक महिला शरीरविक्रयासाठी पुरवते. त्यातून मिळणाऱ्या उत्पन्नावर ही महिला स्वतःची उपजीविका करत असल्याची माहिती नवी मुंबईतील तुर्भे एमआयडीसी पोलिसांना मिळाली होती. या माहितीनंतर पोलिसांच्या पथकाने ३० मे २०१८ रोजी के. के. आर. रोड परिसरातील एका घरामध्ये छापा टाकला. पोलिसांनी ही कारवाई बनावट ग्राहक पाठवून केली असून या प्रकरणी विविध कलमांअंतर्गत संबंधित महिलेविरुद्ध पोलिस ठाण्यात गुन्हा दाखल झाला होता. या महिलेला पोलिसांनी अटकही केली होती. ही महिला मुळची कोलकता येथील असून पोलिसांनी या गुन्ह्याचा तपास करत न्यायालयात तिच्याविरूद्ध आरोपपत्र दाखल केले.
या खटल्याची सुनावणी ठाणे सत्र न्यायालयात चालू होती. विशेष सरकारी वकील रेखा हिवराळे यांनी न्यायालयात सरकारी पक्षातर्फे भक्कमपणे बाजू मांडली. साक्षी, पुरावे ग्राह्य धरत न्यायालयाने आरोपी महिलेला पिटा कलम ४ मध्ये एक वर्षांची सक्तमजुरीची शिक्षा आणि १ हजार रुपये दंड ठोठावला. दंड न भरल्यास दहा दिवसांचा साधा करावासा महिलेला भोगावा लागणार आहे. तर, पिटा कलम ५ मध्येदेखील या महिलेला तीन वर्षांची सक्तमजुरीची शिक्षा तसेच एक हजार रुपये दंड ठोठावला आहे. हा दंड न भरल्यास महिलेला आणखी दहा दिवसांचा साधा कारावास भोगावा लागणार आहे. तर अन्य कलमामध्ये तिची निर्दोष सुटका झाली आहे.
या प्रकरणात आणखी एक महिला आरोपी असून ज्या खोलीमध्ये पोलिसांनी छापा टाकला ती खोली या महिलेच्या मालकीची आहे. तिची मात्र या गुन्ह्यातून निर्दोष सुटका झाली आहे.