शीतपेयामध्ये नशेचे औषध टाकून एका इंजिनीअरिंगच्या विद्यार्थी तरुणाला ब्लॅकमेल करत त्याच्याकडून ३० लाख रुपये किमतीचे सोन्याचे दागिने लुबाडल्याची घटना घडली असून डोंबिवलीतील या तरुणाच्या तक्रारीनंतर टिळकनगर पोलिसांनी कोल्हापूर येथून एका आरोपीला अटक केली आहे. संजय राजपूत असे अटक करण्यात आलेल्या आरोपीचे नाव असून त्याच्या आणखी दोन साथीदारांचा शोध सुरू आहे.
डोंबिवलीतील एक १८ वर्षीय तरुण कोल्हापूरमधील एका मोठ्या कॉलेजमध्ये इंजिनीअरिंगचे शिक्षण घेत आहे. २०२०मध्ये हा तरुण काही मित्रांसोबत एका फार्म हाऊसवर पार्टी करण्यासाठी गेला होता. तिथे पीडित तरुणाच्या मित्रांनी त्याच्या शीतपेयात नशेचे औषध टाकत त्याचे एका तरुणीसोबत अश्लील व्हिडीओ काढले. त्यानंतर हे व्हिडीओ व्हायरल करण्याची धमकी देत त्याच्याकडून वारंवार दागिने लुटले. मागील दीड वर्षाच्या कालावधीत बदनामीच्या भीतीने या तरुणाने ८०० ग्रॅम वजनाचे ३० लाख रुपये किमतीचे दागिने या विद्यार्थ्यांना दिले आहेत. हे कृत्य करणारे तरुण पीडित तरुणाचे मित्रच आहेत. तो डोंबिवलीतील उद्योगपती वडिलांचा मुलगा असल्याचे त्यांना माहीत होते. याप्रकरणी दाखल गुन्ह्याची चौकशी करताना पोलिसांनी संजय राजपूत याला अटक केली आहे. तो कोल्हापूर इचलकरंजीचा रहिवासी आहे. या प्रकरणातील इतर आरोपींचा शोध पोलिसांकडून सुरू आहे.