पैशाला सध्याच्या जगात माणसापेक्षाही जास्त किंमत आहे, असंच चित्र सध्या सगळीकडे पहायला मिळते. त्यातच सोनं म्हटलं तर सख्खे भाऊ देखील त्यासाठी वैरी होऊन बसतात. मात्र, अद्यापही काही लोक आहेत, जे इतके प्रामाणिक आहेत की त्यांच्यासमोर लाखो रुपये असतील तरी ते त्या आमिषाला बळी पडत नाहीत. असंच एक उदाहरण अंबरनाथमध्ये पहायला मिळालं. जिथे रिक्षात विसरलेलं थोडं थोडकं नाही तर तब्बल पाच लाखांचं सोनं रिक्षा चालकाने प्रामाणिकपणे त्याच्या मालकाला परत केलं.
अंबरनाथमध्ये रिक्षाचालकाने प्रामाणिकपणा दाखवत रिक्षात विसरलेलं नऊ तोळ्यांचं सोन्याचं गंठण परत केल्याची घटना घडली आहे. याची किंमत तब्बल पाच लाख असल्याची माहिती आहे. शिवाजीनगर पोलिसांनी या रिक्षाचालकाचा शोध घेत हे गंठण परत मिळवून दिलं आहे.
मुंबईत राहणाऱ्या आस्था निकम या युवतीच्या घराचं काम सुरु असल्यामुळे तिने तिच्या आईचं ९ तोळ्यांचं गंठण अंबरनाथला राहणाऱ्या तिच्या मामाच्या घरी ठेवलं होतं. दिवाळीत लक्ष्मीपूजनासाठी हे गंठण लागणार असल्याने आस्था ही मुंबईहून अंबरनाथला आली आणि मामाकडून गंठण घेऊन घाटकोपरला परत जाण्यासाठी निघाली.
यावेळी अंबरनाथ रेल्वे स्थानकापर्यंत रिक्षाने येऊन ती रेल्वे स्थानकात गेली. मात्र, ज्या पर्समध्ये तिने आईचं नऊ तोळ्यांचं गंठण ठेवलं होतं, ती पर्स आस्था रिक्षामध्येच विसरली. ही बाब लक्षात येताच तिने मामाच्या घरी जाऊन हा प्रकार सांगितला. त्यानंतर मामाने शिवाजीनगर पोलीस स्टेशनला धाव घेत पोलिसांकडे याबाबतची तक्रार दिली. यानंतर पोलिसांनी तांत्रिक तपास करत या रिक्षाचा शोध घेतला असता ही रिक्षा शिवगंगा नगरमध्ये राहणारे रिक्षाचालक रमेश लदगे यांची असल्याचं समोर आलं.
त्यानुसार पोलिसांनी लदगे यांच्याशी संपर्क साधला असता त्यांनी आपल्या रिक्षात एक बॅग महिला प्रवासी विसरुन गेल्याचं सांगितलं. मात्र, ती बॅग लदगे यांनी उघडून देखील पाहिली नव्हती. पोलिसांनी संपर्क साधताच लदगे यांनी प्रामाणिकपणे ही बॅग पोलिसांकडे सुपूर्द केलं.
त्यानंतर आस्था निकम आणि त्यांच्या परिवाराने शिवाजीनगर पोलीस ठाण्यात येऊन रिक्षाचालक रमेश लदगे यांचा सत्कार केला. यावेळी शिवाजीनगर पोलिसांनी रिक्षात राहिलेलं नऊ तोळ्यांचं गंठण आस्था निकम यांना सुपूर्द केलं. या घटनेनंतर शिवाजीनगर पोलीस ठाण्याचे वरिष्ठ पोलीस निरीक्षक अशोक भगत यांनी रिक्षाचालक तसेच रिक्षाचालकाला शोधून काढणारे शिवाजीनगर पोलीस ठाण्याचे कर्मचारी यांचं अभिनंदन केलं आहे.