गेल्या काही महिन्यांपासून धान्य बाजारात महागाईचे वारे सुरू आहेत. डाळींचे दर वाढल्याने सामान्यांची चिंता वाढली होती. विशेषत: तूरडाळ महागल्याने ताटातील वरण गायब होणार की काय, अशी भीती निर्माण झाली होती. या दरवाढीला महिना-दीड महिना लोटत नाही तोच तांदळाचे दर वाढले आहेत. याबाबत अधिक सांगताना धान्याचे ठोक विक्रेता प्रताप मोटवानी म्हणाले, ‘पूर्वी ‘दाल-चावल खाओ, प्रभू के गुण गाओ’, असे म्हटले जायचे. मात्र, आता डाळ आणि तांदूळ दोन्हीचे दर वाढल्याने प्रभूचे नाव घ्यावे तरी कसे, असा प्रश्न उपस्थित झाला आहे.
अनियमित मॉन्सून, प्रतिकूल हवामान, कुठे पूर तर कुठे दुष्काळ अशा हवामानीय परिस्थितीमुळे शेतकऱ्यांचे मोठे नुकसान झाले. त्याचा फटका घटलेल्या धान्य उत्पादनाच्या स्वरूपात दिसून आला. दुसरीकडे धान्य व्यापार बहुराष्ट्रीय कंपन्यांकडे केंद्रित झाला आहे. मोठ्या कंपन्यांनी धान्य व्यापारावर कब्जा मिळविला आहे. त्यामुळे चिल्लर, सेमी होलसेलर, होलसेलर व्यापाऱ्यांसह सर्व धान्य विक्रेते प्रभावित झाले आहेत. त्याचे दुष्परिणाम दरवाढीच्या रूपाने पुढे आले आहेत. चिन्नोर तांदळात एक हजार, तर जय श्रीराममध्ये आठशे रुपयांची वाढ झाली आहे. या दोन प्रकारच्या तांदळाला अधिक मागणी असते. त्याशिवाय स्वर्णा तांदूळ २६०० ते ३००० रुपये प्रतिक्विंटल आणि बीपीटी ३४०० ते ४००० रुपये प्रतिक्विंटल दराने विकल्या जात आहे.
यंदा गव्हाचे दरदेखील चढे दिसून आले आहेत. एमपी बोटचा दर प्रतिक्विंटल ४५०० ते ५५०० रुपये, लोकवन २८०० ते ३५०० रुपये, टुकडी २८०० ते ३६०० रुपये आहे. गव्हाचा हा दर आजवरचा विक्रमी दर सांगण्यात येत आहे. गव्हाप्रमाणेच तूरडाळीचा दर प्रतिक्विंटल १०,००० ते ११,५०० रुपये, उडद ९५०० ते १२,००० रुपये, मूग ९,००० ते ११,००० रुपये, काबुली चना १०,००० ते १२,००० रुपये आहे.
असा झाला बदल
तांदूळ : जुने दर : नवीन दर
चिन्नोर : ५००० ते ५५०० : ६००० ते ६५००