शून्य अथवा कमी विजेचा अत्यंत कमी वापर असलेल्या शिळ, मुंब्रा आणि कळवा येथील वीज ग्राहकांच्या वीजमीटरची तपासणी टोरंट पॉवर कंपनीकडून करण्यात येणार आहे. या भागात संशयास्पद असलेल्या वीजमीटरची संख्या सुमारे ३० हजार असल्याची माहिती कंपनीकडून देण्यात आली.
शून्य अथवा कमी विजेचा अत्यंत कमी वापर असलेल्या शिळ, मुंब्रा आणि कळवा येथील वीज ग्राहकांच्या वीजमीटरची तपासणी टोरंट पॉवर कंपनीकडून करण्यात येणार आहे. या भागात संशयास्पद असलेल्या वीजमीटरची संख्या सुमारे ३० हजार असल्याची माहिती कंपनीकडून देण्यात आली.
यापैकी शून्य वीज वापर असलेल्या मीटरची संख्या सुमारे २० हजार आहे. उर्वरित १० हजार मीटरचा वीज वापर शून्य ते ३० युनिट दरम्यान आहे. या संशयास्पद मीटरच्या वस्तुस्थितीची पडताळणी करण्यासाठी विशेष तपासणी मोहीम राबवण्यात येणार असल्याची माहिती टोरंट पॉवर कंपनीकडून देण्यात आली. घरोघरी भेटी देऊन ग्राहकांनी मीटरमध्ये गैरप्रकार केले आहेत का, याची पाहणी करण्यात येणार आहे. शून्य किंवा कमी वीजवापर दर्शवणाऱ्या मीटरची संख्या अधिक असल्याने मीटर बायपास करून किंवा मीटरमध्ये छेडछाड, अनधिकृत वापर आदी गैरप्रकारांमध्ये काही ग्राहक गुंतलेले असण्याची शक्यता नाकारता येणार नाही, असेही टोरंट पॉवर कंपनीचे म्हणणे आहे. तपासणीमध्ये कोणी दोषी आढळल्यास कायद्यानुसार कारवाई करण्याचा इशारा टोरंटने दिला आहे. विजेची चोरी करणे गुन्हा आहे. तीन वर्षांपर्यंत शिक्षा किंवा दंड तसेच या दोन्ही शिक्षा होऊ शकतात असेही टोरंटकडून सांगण्यात आले. ग्राहकांनी विजेचा अनधिकृत वापर करू नये, असेही आवाहन करण्यात आले आहे.