‘अहो मला लागली कुणाची उचकी’, या गाण्याने एकेकाळी धमाल उडवून दिली. अशीच धमाल आणखी एका उचकीने उडवलीय. हो खरेच, पत्नीला पाहिले की त्याला उचकी लागते. नाना उपचार केले मात्र, उचकी थांबली नाही. शेवटी त्याने कंटाळून पत्नीलाच सोडले. गेल्या तीन वर्षांपासून माहेरी असणाऱ्या महिलेने न्याय मिळावा म्हणत शुक्रवारी ग्रामीण पोलिसांच्या महिला तक्रार निवारण केंद्रात धाव घेतली. आणि अचंबित करणारा प्रकार समोर आला.
अनेकांचे संसार दारू, संशय, कुरबुरीमुळे विस्कटतात. हे धागे जुळवण्याचे काम महिला तक्रार निवारण केंद्र करते. आज त्यांच्यासमोर उचकीमुळे संसार मोडल्याची तक्रार एका पत्नीने केली, तेव्हा केंद्रातले अधिकारीही हैराण झाले. कलावतीचे (नाव बदलले आहे) तीन वर्षांपूर्वी कैलासशी (नाव बदलले आहे) लग्न झाले. दोघेही शिक्षित. लग्नानंतर काही दिवस सुखाचा संसार झाला. अन् कैलासच्या उचकीमुळे या सुखात मिठाचा खडा पडला. पत्नीला पाहाताच उचकी लागते, अशी तक्रार कैलास करू लागला. त्यामुळे कलावतीही भांबावून गेली. नंतर तक्रारीचा पाढा वाढलाच. शेवटी कैलासने पत्नीला माहेरी सोडले. या प्रकारामुळे माहेरकडील मंडळीही हैराण झाली. मुलींचा संसार सुखाने व्हावा, यासाठी त्यांनी प्रयत्न केले. मात्र, तुमच्या मुलीला पाहताच उचकी लागते. थांबत नाही, अशी तक्रार कैलासकडून वारंवार होऊ लागली. पत्नी समोर नसल्यास तो नियमित काम करतो, असा दावाही त्याच्या वडिलांनी केला. यावर उपचार म्हणून दोन्हीकडील मंडळींनी कैलासला नाना डॉक्टरांकडे नेले. देवधर्म झाले. मात्र, तीन वर्षानंतरही काही केल्या फरक पडला नाही. शेवटी पदवीचे शिक्षण घेणाऱ्या कलावतीने कंटाळून थेट पोलिस तक्रार निवारण केंद्राकडे मदतीसाठी धाव घेत आपली कैफियत मांडली. आता दोघांना समोरासमोर बसवून मार्ग काढण्याचे प्रयत्न केंद्राच्या प्रमुख राजश्री आडे, रेखा माळी, उज्ज्वला क्षीरसागर आदींनी सुरू केलेत.
सर्व रिपोर्ट नॉर्मल
कैलासला कान, नाक, घसा तज्ज्ञांकडे दाखविण्यात आले. मात्र, सर्व रिपोर्ट नॉर्मल आल्याचे समोर आले होते. याप्रकरणी योग्य चौकशी करून पुढील कार्यवाही केली जाईल, असे पोलिसांनी सांगितले.
केंद्रातही ‘ती’ आली
या जोडप्याला शुक्रवारी केंद्रात बोलविण्यात आले. त्यावेळी कलावतीने चेहरा कपड्याने बांधून ठेवला. कैलासला ती केंद्रात असल्याचे माहत नव्हते. तोपर्यंत तो शांत होता. मात्र, काही वेळाने त्याने पत्नीला ओळखताच, अचानक त्याची उचकी सुरू झाली.
मला पाहताच त्यांना उचकी लागते कशी? यावर विश्वास कसा ठेवू? उपचाराने सर्व काही बरे होऊ शकते. मी पतीसोबत वेगळ्या ठिकाणी राहण्यास तयार आहे.