अंबड भागातील चुंचाळे शिवारात गळा चिरून महिलेचा खून झाल्याची घटना सोमवारी पहाटे उघडकीस आली. आंबेडकर नगरातील एका घरात संगीता सचिन पवार (वय २२) या विवाहितेचा मृतदेह आढळून आला. औरंगाबाद पोलिसांसमोर स्वत:हून हजर होत नाशिकमध्ये पत्नी रक्ताच्या थारोळ्यात असल्याचे सांगून खुनाचा बनाव करणाऱ्या पती सचिन पवार (वय २७) यानेच पत्नीचा अनैतिक संबंधाच्या संशयातून खून केल्याचे तपासात उघड झाले आहे. पोलिसांनी त्याला ताब्यात घेतले आहे. दीड महिन्यातील शहरातील हा नववा खून आहे
पवार कुटुंबीय मूळ औरंगाबाद येथील वाळुंज येथील रहिवासी आहे. दोन महिन्यांपूर्वी त्याला नाशिकच्या कंपनीत नोकरी लागली. यामुळे त्याने अंबड भागातील चुंचाळे शिवारात संतोष केदारे यांचे घर भाडेतत्त्वावर घेतले. गुरुवारी (दि. २३) औरंगाबादवरून पत्नी संगीता हिला संशयिताने नाशिकमध्ये आणले. अनैतिक संबंधांवरून त्यांच्यात तीन दिवस सतत वाद झाले. या वादातून रविवारी (दि. २६) दुपारी तीन वाजेच्या सुमारास सचिनने पत्नीचा गळा चिरून खून केला. यानंतर घराला कुलूप लावून थेट मूळ गावी पळ काढला. औरंगाबादेत पोहोचल्यावर पोलिसांसमोर हजर होत त्याने हकीकत सांगितली. यामुळे रविवारी रात्री औरंगाबाद नियंत्रण कक्षातून नाशिक पोलिसांना ‘अलर्ट’ मिळाला. त्यानुसार पोलिस निरीक्षक भगीरथ देशमुख, श्रीकांत निंबाळकर यांच्यासह अंबड गुन्हे शोध पथक चुंचाळे शिवारात पोहोचले. पथकाने तपासणी केल्यावर संगीता पवार यांचा मृतदेह आढळून आला.
संगीता आणि सचिन यांना दोन वर्षांची मुलगी आहे. पती-पत्नी नाशिकला आल्यावर मुलीला औरंगाबादेत आजी-आजोबांकडे ठेवले होते. आता तिच्या आईचा खून झाला असून, वडिलांना पोलिसांनी अटक केली आहे.
– भगीरथ देशमुख, वरिष्ठ पोलिस निरीक्षक, अंबड