ब्रिटन आणि आयर्लंडमध्ये बलात्काराचे पाच गुन्हे दाखल असलेल्या आणि ब्रिटनमधून सन २०१६मध्ये पळून आलेल्या आरोपीला नवी मुंबई पोलिसांच्या गुन्हे शाखेने भिवंडी येथून अटक केली. पलविंदर उब्बी (वय ५७) असे या आरोपीचे नाव असून, तो एका मल्टीनॅशनल कंपनीत चालक म्हणून काम करत होता. त्याला इंटरपोलने फरार म्हणून घोषित केले होते. नवी दिल्ली येथील पटियाला हाऊस न्यायालयाने त्याची रवानगी न्यायालयीन कोठडीत केली आहे.
पलविंदर उब्बी याच्यावर ब्रिटन आणि उत्तर आयर्लंडमध्ये पाच बलात्कारांचे गुन्हे दाखल आहेत. तो सन २०१६मध्ये ब्रिटनमधून भारतात पळून आला होता. भारत आणि ब्रिटनमध्ये प्रत्यार्पण करार असल्याने, ब्रिटन सरकारने भारताच्या परराष्ट्र मंत्रालयाकडे पत्रव्यवहार करून या गुन्हेगाराबद्दल माहिती दिली. परराष्ट्र मंत्रालयाने गृहमंत्रालयाला पत्र लिहिले आणि त्यानंतर केंद्रीय अन्वेषण ब्यूरोने (सीबीआय) इंटरपोलला पत्र पाठविले. सीबीआय-इंटरपोलने महाराष्ट्र राज्याच्या अतिरिक्त महासंचालकांना सतर्क केले होते.
अतिरिक्त महासंचालकांनी नवी मुंबईचे पोलिस आयुक्त बिपीन कुमार सिंग यांच्याशी संपर्क साधल्यानंतर त्यांनी गुन्हे शाखा युनिट-१चे वरिष्ठ पोलिस निरीक्षक सुनील शिंदे यांना या कामी नियुक्त केले. गुन्हे शाखेने या आरोपीचा शोध घेतला असता, तो नेरुळमध्ये राहत असलेल्या आपल्या आईला नियमित भेटण्यासाठी येत असल्याची माहिती गुन्हे शाखेला मिळाली होती. मात्र, आईच्या मृत्यूनंतर पलविंदर याने नेरुळ येथील घरी जाणे बंद केले होते. तपासादरम्यान त्याने सन २०१९पर्यंत वापरलेल्या मोबाइल फोनची माहिती गुन्हे शाखेच्या पथकाला मिळाली. उपलब्ध माहितीचा वापर करून सन २०१९मध्ये वारंवार कॉल केल्या गेलेल्या क्रमांकाची पडताळणी करण्यात आली. काही संशयित क्रमांकांवरून पलविंदरचा मोबाइल क्रमांक शोधण्यात गुन्हे शाखेला यश आले. त्यानंतर गुन्हे शाखेने तांत्रिक साधनांच्या मदतीने पलविंदर भिवंडीत असल्याची माहिती मिळवल्यानंतर त्याला अटक केली.