एका व्यापाऱ्याकडे आढळून आलेल्या किलो सोन्याचा तपास आता राज्य जीएसटी विभागाकडे आला आहे. सोने संबंधित व्यापाऱ्यांचे असल्याचे तपासात समोर आले, परंतु या व्यवहारात करचुकवेगिरी झाल्याचा संशय व्यक्त केला जात असून याबाबतचा गोपनीय अहवाल व संबंधित कागदपत्रे राज्य जीएसटी विभागाकडे सुपूर्द करण्यात आली आहेत, अशी माहिती चिकलठाणा पोलिस ठाण्याने दिली. तर संदर्भात राज्य जीएसटी विभागाचे सह आयुक्त जी. श्रीकांत यांच्याशी संपर्क साधला असता पोलिसांचे एक सीलबंद पत्र प्राप्त झाले असून याबाबत तपासणी केली जाईल, असे त्यांनी नमूद केले.
अवैध दारु विक्रीसह अन्य गुन्हेगारी कारावायांना आळा घालण्यासाठी म्हणून चिकलठाणा पोलिसांचे एक पथक शेंद्रा एमआयडीसी परिसरात गुरुवारी सायंकाळी कारवाईसाठी गेले होते. संशयित वाहनाची तपासणी करत असतानाच एका दुचाकीच्या डिक्कीत एक किलो सोने आढळून आले. संबंधित व्यक्ती मुंबईचा व्यापारी असल्याचे सांगितले. सोन्याच्या दागिन्याचे सॅम्पल घेऊन येथे दाखविण्यासाठी आणल्याचे त्याने पोलिसांना सांगितले. संशय आल्याने पोलिसांनी दागिन्याच्या पावत्याची मागणी करत त्याची उशीरापर्यंत चौकशी केली. दरम्यान, सोन्याचे दागिने त्या व्यक्तीचे असल्याचे समोर आले.