कपडे धुणाऱ्या महिला आता आमदार होण्याचा वाटेवर आहे. राष्ट्रीय जनता दलाचे अध्यक्ष लालू प्रसार यादव यांनी एका सर्व सामान्य महिलेला विधान परिषदेचे तिकिट दिलं आहे. या महिलेचं नाव मुन्नी रजक असं असून मुन्नी देवी या नालंदा येथील बख्तियारपूर येथील रहिवासी आहेत. त्या पटना येथे कपडे धुण्याचे काम करतात.
बिहार विधान परिषदेच्या सात जागांसाठी निवडणूका होत आहेत. त्या पार्श्वभूमीवर सोमवारी राजदनं तीन उमेदवारांची घोषणा केली आहे. यामध्ये मुन्नी रजक यांच्या नावाची घोषणा होताच सगळ्यांनी आश्चर्य व्यक्त केली आहे. आर्थिक दृष्ट्या कमकुवत आणि मागासवर्गीय समाजातून येणाऱ्या महिलेला उमेदवारी देऊन राजदने बिहारमध्ये एक मोठा संदेश दिला आहे.
आश्चर्याची गोष्ट म्हणजे, मुन्नी रजक यांच्याकडे स्वतःचा मोबाइल फोनदेखील नाहीये. त्या दुसऱ्यांकडे कपडे धुण्याचे काम करुन स्वतःचे घर चालवतात. इतकंच नव्हे तर, मुन्नीदेवी या राजदच्या सर्वात सक्रीय महिला कार्यकर्त्या म्हणून ओळखल्या जातात. लालू यादव यांच्या घरी सीबीआयने धाड टाकली होती. त्यादरम्यान सीबीआय विरोधात घोषणा करताना मुन्नी देवी सर्वात आघाडीवर होत्या. त्यांनाच आता पक्षाने विधान परिषदेवर पाठवण्याचा निर्णय घेतला आहे.
पक्षाचे तिकीट मिळाल्यानंतर मुन्नी देवी यांनी प्रसारमाध्यमांशी संवाद साधला, त्यावेळी त्या म्हणाल्या की, मला माजी मुख्यमंत्री राबडी देवी यांच्या घरुन फोन आला तेव्हा मला भिती वाटली होती. मी काहीतरी चुकीचं काम केलंय आणि त्यामुळेच मला राबडी देवींनी बोलावलंय, असं वाटलं. पण असं काही घडलं नाही. मी आत गेल्यानंतर तिथे लालू प्रसाद यादव, राबडी देवी, विरोधीपक्ष नेते तेजस्वी यादव व तेज प्रताप यादव उपस्थित होते. त्यांनी विधानपरिषदेसाठी तुम्हाला पक्षाकडून उमेदवारी देत आहोत, अशी घोषणा केली, असं मुन्नी देवी सांगतात. यानंतर मुन्नी देवी यांनी पक्षाचे आभार मानले आहे. कपडे धुणाऱ्या एका गरिब महिलेला पक्षाने एक मोठं गिफ्ट दिलं आहे, असंही त्या म्हणतात.