नागपूर रेल्वे स्थानकावर सोमवारी रात्री जिलेटिनच्या एका बॅगमध्ये तब्बल ५४ कांड्या आढळल्याने खळबळ उडाली आहे. ही बॅग नेमके कोण घेऊन आले व पोलिस बुथजवळ कोणी ठेवली याचा सीसीटीव्हीद्वारे शोध घेण्यात येत असल्याचे लोहमार्ग पोलिसांनी सांगितले.
रेल्वे स्थानकावर मुख्य प्रवेशद्वारानजीक असलेल्या वाहतूक पोलिस बुथजवळ सायंकाळी ७.३० वाजतादरम्यान एक बेवारस बॅग पडून होती. पोलिसांनी ही बॅग उघडून पाहिली असता त्यात जिलेटिनच्या कांड्या आढळल्या. लगेच याबाबत श्वान पथक आणि बॉम्बशोध व नाशक पथकाला कळविण्यात आले. तातडीने ही दोन्ही पथके रेल्वेस्थानकावर दाखली झाली. लोहमार्ग पोलिस आणि आरपीएफनेही तातडीने घटानस्थळी धाव घेऊन संपूर्ण परिसर सील केला. त्यानंतर बॉम्ब शोध व नाशक पथकाने या जिलेटिनच्या कांड्या ताब्यात घेऊन नष्ट करण्यासाठी बाहेर नेल्या. कमी क्षमतेच्या स्फोटासाठी या जिलेटिनचा उपयोग होतो. विशेषत: विहीर खोदताना किंवा उद्योगांमध्ये त्यांचा वापर केला जातो. या घटनेनंतर शीघ्र कृती पथक रेल्वे स्थानकावर तैनात करण्यात आले आहे.
ही स्फोटके काळ्या बॅगमध्ये सीलबंद अवस्थेत होती. त्यांना वीज प्रवाह मिळाला असता तर त्यांचा स्फोट होऊ शकला असता. नागपुरात परप्रांतातील मजूर येतात आणि येथून जातातही. मोठ्या प्रमाणावर मजूर पुरविणारेही आहेत. त्यामुळे ते मजुरांचे साहित्य असावे, अशीही शक्यता वर्तविण्यात येत आहे. मजुरांचे हे साहित्य असतील तर स्फोटकांची माळ कशी, असाही प्रश्न सुरक्षा व्यवस्थेकडून उपस्थित केला जात आहे. काही घातपात करण्याच्या उद्देशाने तर आणले नाही, या दिशेने तपास सुरू आहे.