राज्यातील मित्र पक्ष असलेल्या शिवसेना आणि राष्ट्रवादीमध्ये ठाणे शहरामध्ये सातत्याने खटके उडत असतानाच मंगळवारी ठाण्याच्या दौऱ्यावर असलेल्या राष्ट्रवादीच्या खासदार सुप्रिया सुळे आणि गृहनिर्माणमंत्री जितेंद्र आव्हाड यांनी शिवसेना शाखेत उपस्थिती लावली. बाळकुम येथील यशवंतराव चव्हाण यांच्या पुतळ्याच्या अभिवादनासाठी आलेल्या सुप्रिया सुळे यांना येथील शिवसैनिकांनी शाखेत येण्याचे निमंत्रण दिले. त्यानंतर त्यांनी हे निमंत्रण स्वीकारून शिवसेना शाखेमध्ये जाऊन शिवसैनिकांशी संवाद साधला.
यशवंतराव चव्हाण प्रतिष्ठानच्या कार्यक्रमानिमित्त सुळे मंगळवारी ठाण्यात आल्या होत्या. त्याच भागात असलेल्या बाळकुम शिवसेना शाखेत येण्यासंदर्भात येथील शिवसेना पदाधिकाऱ्यांनी विनंती केली. या निमंत्रणाचा स्वीकार करून सुळे, आव्हाड यांनी या शाखेमध्ये प्रवेश केला. गेल्या काही महिन्यात शिवसेनेशी ठाण्यात सुरू असलेल्या संघर्षाला विराम देण्याचा प्रयत्न असल्याची चर्चा सुरू झाली होती. ही आमची रणनीती असून महापालिका निवडणुकीतील निर्णय त्यावेळी जाहीर करू, असे उत्तर यावेळी सुळे यांनी दिले. तर आंब्याच्या झाडालाच लोक दगड मारतात; बाभळीच्या झाडाकडे लोक ढुंकूनही पहात नाहीत, असे सूचक विधान करून राष्ट्रवादी काँग्रेसचे राष्ट्रीय अध्यक्ष शरद पवार यांच्यावर केलेल्या टीकेबाबत सुळे यांनी टोला लगावला.