जम्मू काश्मीरमध्ये आज पहाटे भूकंपाचे धक्के जाणवले. हे धक्के ५.३ रिश्टर स्केलचे असल्याची नोंद झाली आहे. भूकंपाचं केंद्र ताजिकिस्तान असल्याचं सांगितंल जात आहे. जम्मू काश्मीरमध्ये सकाळी ५.३५ वाजता भूकंपाचा धक्का जाणवला. येथील काही भागांमध्ये हे धक्के जाणवले. आतापर्यंत कुठेही जीवितहानी झाल्याची नोंद झालेली नाही. भूंकपाचा केंद्रबिंदू जम्मू काश्मीरपासून १७० कि.मी. अंतरावर ताजिकिस्तानमध्ये असल्याची माहिती आहे.
जम्मू काश्मीरमधील लोक भूकंपाचे धक्के जाणवू लागल्यानं काही लोक घराबाहेर पडले होते. तर, बहुतांश लोक झोपलेले होते. अनेंकाना भूकंपाचे धक्के देखील जाणवले नाहीत. भारतासह, अफगाणिस्ताना आणि ताजिकिस्तानमध्ये भूकंपाचे धक्के बसले आहेत. राष्ट्रीय भूकंपशास्त्र केंद्र यांच्याकडून देखील यासंदर्भात माहिती देण्यात आली आहे. जम्मू आणि काश्मीर खोऱ्यात आज पहाटे जाणवलेल्या भूकंपामुळं कुठंही जीवितहानी झालेली नाही.
लडाखमधील कारगीलमध्ये २४ एप्रिलला भूकंपाचे धक्के जाणवले होते. राष्ट्रीय भूकंपशास्त्र केंद्राकडून जारी करण्यात आलेल्या माहितीनुसार त्याची तीव्रता ४.२ रिश्टर स्केल इतकी होती. इंडोनेशियामध्ये १९ एप्रिलला ६ रिश्टर स्केलचा भूकंप झाला होता. राष्ट्रीय भूकंपशास्त्र केंद्रानं दिलेल्या माहितीनुसार त्याचं केंद्र सुलोवासीपासून ७७९ किमी अंतरावर होतं. त्यापूर्वी तैवानची राजधानी ताइपे येथे देखील ६.७ रिश्टर स्केलचा भूकंप झाला होता.
8 ऑक्टोबर २००५ मध्ये काश्मीर खोऱ्यात मोठा भूकंप झाला होता. त्यामध्ये ८० हजार लोकांचा मृत्यू झाला होता. भारताचा भूभाग असलेल्या पाकव्याप्त काश्मीरमध्ये त्याचं केंद्र होतं.
भूकंप आल्यास कोणती काळजी घ्यायची
भूकंप झाल्याची माहिती मिळाल्यानंतर तुम्ही इमारतीमध्ये असाल तर तातडीनं घराबाहेर पडून बाहेरील मोकळ्या ठिकाणी जमा व्हावं. भूकंपावेळी मोकळ्या मैदानासारखी सुरक्षित जागा नसते त्यामुळं मैदानात जाण्याचा प्रयत्न करावा. कोणत्याही इमारतीजवळ थांबू नका. भूंकपावेळी तुम्ही लिफ्ट असणाऱ्या इमारतीमध्ये वास्तव्याला असल्यास लिफ्टचा वापर टाळून पायऱ्यांचा वापर करा. घराची दारं आणि खिडक्या खुल्या ठेवाव्यात आणि घरांतील लाईट बंद करावी