पुणे स्टेशन परिसरात पोलिसांनी बारा लाख रुपयांचे एमडी (मेफेड्रोन) जप्त केले आहे. अमली पदार्थ विक्रीसाठी पुण्यात आलेल्या मुंबईतील एकाला राज्य दहशतवादविरोधी पथकाने (एटीएस) अटक केली असून, त्याच्याकडून ११ लाख ८० हजार रुपयांचे ११८ ग्रॅम एमडी (मेफेड्रोन) जप्त करण्यात आले आहे.
महंमद फारुख महंमद उमर टाक (वय ४३, रा. म्हाडा कॉलनी, अंधेरी, मूळ रा. राजस्थान) असे अटक करण्यात आलेल्या अमली पदार्थ तस्कराचे नाव आहे. याबाबत पोलिस हवालदार अशोक पेरणेकर यांनी दहशतवादविरोधी पथकाच्या मुंबईतील पोलिस ठाण्यात फिर्याद दिली आहे. दहशतवादविरोधी पथकाने दिलेल्या माहितीनुसार, मालधक्का चौक रस्त्यावर एक जण अमली पदार्थ विक्रीसाठी येणार असल्याची माहिती मिळाली होती. त्यानुसार दहशतवादविरोधी पथकाने सापळा रचून महंमद टाक याला पकडले. त्याची तपासणी केली असता ११ लाख ८० हजार रुपयांचे ११८ ग्रॅम ‘एमडी’ आढळून आले. यासोबत मोबाइल, डिजिटल वजन काटा, दोन हजार ५९० रुपये रोख, आधार कार्ड, डेबिट कार्ड असा मुद्देमाल जप्त करण्यात आला. पोलिस निरीक्षक संतोष सुबाळकर, सहायक निरीक्षक दत्तात्रय दराडे आदी कर्मचाऱ्यांनी ही कारवाई केली. पुढील तपास पोलिस निरीक्षक विश्वास भास्कर करीत आहेत.