संगीतकार हृदयनाथ मंगेशकर यांची प्रकृती अचानक बिघडल्याने त्यांना इस्पितळात दाखल करण्यात आले. साधारणपणे १० दिवसांत वडिलांना घरी जाण्याची परवानगी मिळेल, असं त्यांचा मुलगा आदिनाथ मंगेशकर यांनी सांगितले. हृदयनाथ यांना इस्पितळात का दाखल करण्यात आलं हे अजूनपर्यंत कळू शकलेलं नाही.
लता दीनानाथ मंगेशकर पुरस्कार सोहळ्यादरम्यान आदिनाथ यांनी उपस्थितांना संबोधित करताना सांगितले की, वडील हृदयनाथ नेहमी मनोगत व्यक्त करत आणि ट्रस्टबद्दल माहिती द्यायचे, पण यावर्षी त्यांना तसे करता आले नाही. ते म्हणाले, ‘याआधी माझे वडील पंडित हृदयनाथ मंगेशकर आपलं मनोगत व्यक्त करून आमच्या ट्रस्टची माहिती द्यायचे. या वर्षी ते इस्पितळात असल्याने त्यांना तसे करता आले नाही.’
षण्मुखानंद सभागृहात आपल्या भाषणादरम्यान आदिनाथ म्हणाले, ‘देवाच्या कृपेने ते येत्या आठ ते १० दिवसांत घरी परततील. त्यांची प्रकृती स्थिर असून त्यात सुधारणा होत आहे.’ यासोबतच पहिला लता दीनानाथ मंगेशकर पुरस्कार पंतप्रधान नरेंद्र मोदी यांना प्रदान करण्यात आला. या कार्यक्रमाला मोदी उपस्थित होते आणि त्यांनी हृदयनाथ मंगेशकर यांना लवकरात लवकर बरं वाटावं यासाठी शुभेच्छा देऊन भाषणाला सुरुवात केली.
लता दीनानाथ मंगेशकर पुरस्कार
मास्टर दीनानाथ मंगेशकर पुरस्कार सोहळ्याचा एक भाग म्हणून रविवारी लता दीनानाथ मंगेशकर पुरस्कार प्रदान करण्यात आला. रविवारी मास्टर दीनानाथ मंगेशकर यांची ८० वी पुण्यतिथी होती. फेब्रुवारीमध्ये निधन झालेल्या लता मंगेशकर यांच्या स्मरणार्थ आणि त्यांच्या स्मृतीप्रित्यर्थ यावर्षीपासून हा पुरस्कार सुरू करण्याचा निर्णय घेतल्याचं कुटुंब आणि मास्टर दीनानाथ मंगेशकर स्मृती प्रतिष्ठान चॅरिटेबल ट्रस्टने एका निवेदनात म्हटलं होतं. वयाच्या ९२ व्या वर्षी लता मंगेशकर यांनी अखेरचा श्वास घेतला.