शिवीगाळ केल्याने दोन युवकांनी संदीप किसनराव दुपारे (वय ४०, रा. कपिलनगर, हुडकेश्वर) यांची दगडाने ठेचून हत्या केली. ही थरारक घटना मानेवाडा-बेसा मार्गावरील अंबाशक्तीनगर येथे गुरुवारी पहाटे उघडकीस आली. अजनी पोलिसांनी खुनाचा गुन्हा दाखल करून दोन मारेकऱ्यांना अटक केली.
रमेश चैनसिंग बागेश्वर (वय २६) आणि उज्ज्वल मुकेश भिसीकर (वय २१, दोन्ही रा. अंबाशक्तीनगर) अशी अटकेतील मारेकऱ्यांची नावे आहेत.
संदीप मनोरुग्ण होते. गेल्या आठ दिवसांपासून ते मानेवाडा भागात फिरायचे. बुधवारी मध्यरात्री १ वाजताच्या सुमारास रमेश आणि उज्ज्वल दोघेही घराजवळील रिकाम्या प्लॉटमध्ये बीअर पित होते. संदीप तेथे गेले. त्यांनी दोघांना बीअर मागितली. दोघांनी त्यांना बीअर दिली. संदीप यांनी बीअर प्यायल्यानंतर सिगारेट मागितली. दोघांनी त्यांना सिगारेटही दिली. त्यानंतर संदीप यांनी अचानक दोघांना शिवीगाळ सुरू केली. त्यामुळे दोघेही संतापले. त्यांनी दगडाने डोके ठेचून संदीप यांची हत्या केली व पसार झाले. पहाटे मॉर्निंग वॉकला जाणाऱ्या नागरिकांना मृतदेह दिसला. त्यांनी अजनी पोलिसांना माहिती दिली. अजनी पोलिसांचा ताफा तेथे पोहोचला. सीसीटीव्ही फुटेज तपासले. मृतक व मारेकऱ्यांची ओळख पटली. पोलिसांनी दोघांना अटक केली. शिवीगाळ केल्याने हत्या केल्याचे दोघांनी पोलिसांना सांगितले. रमेश व उज्ज्वलविरुद्ध यापूर्वीही गुन्हे दाखल असल्याची माहिती आहे.
उपायुक्तांकडून बक्षीस
अंबाशक्तीनगरमधील हत्याकांडाचा उलगडा करून मारेकऱ्यांना तत्काळ अटक करण्यात अजनी पोलिसांना यश आले. या उल्लेखनीय कामगिरीबाबत पोलिस उपायुक्त नुरुल हसन यांनी अजनी पोलिसांच्या तपास पथकाला दहा हजारांचे बक्षीस जाहीर केले.