केंद्र सरकारने खाद्यतेलांच्या आयात शुल्कात कपात केल्याने डिसेंबर आणि जानेवारीमध्ये खाद्यतेलांच्या दरांत घसरण बघायला मिळत होती. परंतु गेल्या पंधरा दिवसांपासून रशिया आणि युक्रेन सुरू असलेल्या युद्धामुळे खाद्यतेलांचे मुख्यत: सूर्यफूल तेलांच्या दरांत मोठी वाढ झाली आहे. गेल्या महिनाभरात सूर्यफूल तेलाच्या दरांत १५ किलोमागे ६८० रुपयांची वाढ झाली आहे. याचबरोबर सोयाबीन तेलाच्याही दरांत ४८० रुपयांची वाढ झाली आहे.
रशिया आणि युक्रेनमधील युद्धाची घोषणा झाल्यानंतर फेब्रुवारीच्या मध्यापासून सातत्याने खाद्यतेलांच्या दरांत वाढ होत आहे. देशात ८० टक्के खाद्यतेल हे आयात केले जाते. यातही सर्वाधिक आयात युक्रेनमधून होत असते. मात्र, युद्धाच्या स्थितीमुळे युक्रेनहून होणारी आयात बंद झाल्याने शहरात खाद्यतेलांचा मुख्यत: सूर्यफूल तेलाचा मोठा तुटवडा झाला आहे. अगदी व्यावसायिकांनाही मागणीच्या तुलनेत कमी प्रमाणात तेल उपलब्ध झाल्याने दरांत मोठी वाढ झाली. २४ फेब्रुवारीला युद्ध सुरू झाल्याने एका दिवसात खाद्यतेलांच्या दरांत दहा ते १३ रुपयांची वाढ झाल्याचे बघायला मिळाले होते. २४ फेब्रुवारीला सकाळी दहा वाजता १४७ रुपये किलो असलेले सोयाबीन सायंकाळी सात वाजता तेल १६० रुपये किलोवर जाऊन पोहोचले होते. तर सूर्यफूल तेल दहा रुपयांनी वधारुन १६२ वरुन १७२, शेंगदाणा तेल १७२ वरुन १८५, पामतेल १४५ रुपयांवरुन १५५ रुपायांवर गेल्याचे दिसून आले. यानंतरही खाद्यतेलांच्या दरांत सातत्याने वाढ झाल्याने सर्वसामान्यांना आर्थिक झळ सहन करावी लागत आहे. युक्रेनहून खाद्यतेलांची आयात सुरळीत झाल्यानंतर हे दर कमी होती असे व्यावसायिकांकडून सांगितले जात आहे.
स्वयंपाकघरात बसताय झळा
युद्ध युक्रेन-रशियात सुरू असले तरी त्याच्या झळा मात्र भारतात सर्वसामान्यांना बसत आहेत. करोनाची लाट ओसरल्याने शाळा, महाविद्यालये, कार्यालय, विविध ऑफिस पूर्ण क्षमतेने सुरू झाले आहेत. ऑनलाइन स्कूल, वर्क फ्रॉम होम बंद झाले आहे. त्यामुळे घरोघरी स्वयंपाकघरात सकाळची न्याहारी, शाळा-ऑफिसचे डबे, दुपारचे जेवण, सायंकाळी काहीतरी चटकमटक आणि रात्रीचा स्वयंपाक असल्याने तेलाची मागणी वाढली आहे. त्यात दरवाढ झाल्याने सर्वसामान्य होरपळले आहेत.
असे आहेत दर (१५ किलो)
तेल जुने दर नवे दर महिनाभरातील वाढ
सूर्यफूल २०७० २७५० ६८०
सोयाबीन २१४० २६२० ४८०