सायंकाळी गावाजवळील महामार्गालगत पायी फिरायला गेलेल्या दोन शिक्षिकांचा कारच्या धडकेत मृत्यू झाला. बुधवारी सायंकाळी पुणे-नाशिक महामार्गावर बोटा (ता. संगमनेर) येथे ही घटना घडली. सुनीता रामदास माकोडे व नंदा रामनाथ पारधी यांचा यामध्ये मृत्यू झाला आहे. महामार्गावरून जाणाऱ्या भरधाव कारचालकाचे नियंत्रण सुटल्याने कारची धडक बसून त्यांचा मृत्यू झाला.
या दोघी दररोज सायंकाळी गावजवळ बायपास रोडवर पायी फिरण्यासाठी जात होत्या. बुधवारी सायंकाळी त्या नेहमीप्रमाणे फिरण्यासाठी गेल्या. त्यावेळी नाशिक- पुणे महामार्गावरून कार (एमएच -१४, इ वाय ७८७३) संगमनेरहून पुण्याकडे जात होते. कारचालकाचे नियंत्रण सुटले. त्यामुळे कार महामार्गावरून उपरस्त्याकडे आली. तेथे पायी चालत असलेल्या या दोघींना कारची धडक बसली. यामध्ये सुनीता माकोडे जागीच ठार झाल्या तर नंदा पारधी गंभीर जखमी झाल्या. अपघाताची मिळताच आजूबाजूच्या ग्रामस्थांनी मदतीसाठी धाव घेतली. जखमी पारधी यांना आळेफाटा येथे खाजगी हॉस्पिटलमध्ये हलविण्यात आले. मात्र उपचार सुरू असताना त्यांचाही मृत्यू झाला.
घारगाव पोलीस ठाण्याचे पोलीस निरीक्षक सुनील पाटील, किशोर लाड यांनी घटनास्थळी धाव घेतली. दोन्ही मृतदेह शवविच्छेदन करण्यासाठी संगमनेरच्या रुग्णालयात नेण्यात आले. बोटा गावातील दोन शिक्षिकांचा एकाचवेळी अपघाती मृत्यू झाल्याने गावात हळहळ व्यक्त करण्यात येत आहे. शोकाकूल वातावरणात त्यांच्यावर अंत्यसंस्कार करण्यात आले.