हिंगोली जिल्ह्यातल्या आखाडा बाळापूर येथे मध्यरात्री दुसऱ्याच्या घरासमोर देवपूजा मांडत दिवा लावणे एका महिलेच्या चांगलेच अंगलट आले आहे. याप्रकरणी जादूटोणा अधिनियमअंतर्गत महिले विरुद्ध पोलिसात गुन्हा दाखल करण्यात आला आहे. सदरील महिला घराबाहेर पूजा मांडत असताना तिला रंगेहात पकडण्यात आले व पोलिसांच्या स्वाधीन करण्यात आले आहे.
कळमनुरी तालुक्यातील साळवा येथे १२ फेब्रुवारी रोजी मध्यरात्री तीन वाजताच्या सुमारास एक महिला दुसऱ्याच्या घरासमोर अंधारात पूजा म्हणताना दिसली. दुसऱ्याच्या दरवाजासमोर हळद, कुंकू, तांदूळ असे पूजेचे साहित्य मांडत दिवाही पेटविला ही पूजा सुरू असताना एक शेजारी लघुशंकेसाठी जागा झाला. त्यांनी हा प्रकार पाहताच ते घर मालकाला फोन करून माहिती दिली. घरातल्यांनी दरवाजा उघडून हा प्रकार पाहिला आणि पूजा करणाऱ्या महिलेला रंगेहात पकडले.
त्यानंतर शेजाऱ्यांनी व गावातील इतरांनी एकच गर्दी करत दुसऱ्याच्या अंगणात सुरू असलेली मध्यरात्रीची ही पूजा उघडकीस आणली. त्यानंतर गावकऱ्यांनी मस्तानी पोलिसांना फोन करून या घटनेची माहिती दिली. त्यानंतर घटनास्थळी ठाणेदार पंढरीनाथ बोधनापोड, पोलीस उपनिरीक्षक बालाजी पुंड त्यांच्या पथकाने सदरील महिलेस ताब्यात घेतले.
याप्रकरणी प्रियंका मंचकराव चव्हाण रा. साळवा यांच्या तक्रारीवरून धुरपतबाई बेगाजी कदम वय ६५ वर्ष यांच्याविरुद्ध महाराष्ट्र नरबळी जादूटोणा अधिनियम २०१३ च्या कलम (सी),३,(२) अन्वये गुन्हा दाखल केला आहे. या तक्रारीत आरोपी महिलेने तक्रारदाराच्या घरा समोरील पायरीवर तक्रारदार व कुटुंबातील लोकांवर करणी, भानामतीसारखी जादूटोणा करण्याच्या उद्देशाने पूजा मांडली म्हणून गुन्हा दाखल केल्याचे म्हटले आहे. या घटनेमुळे परिसरात एकच खळबळ उडाली असून सध्या या जादूटोण्याची एकच चर्चा सुरू झाली आहे. याप्रकरणी पोलिस अधिक तपास करीत आहे