व्यावसायिक कार्यालयाच्या वापरासाठी घेतलेल्या चारचाकीतून अधिक नफा व्हावा म्हणून भाडेतत्वावर देण्याचा निर्णय झाला. त्यानुसार मुंबईतल्या एका व्यक्तीशी व्यवहार ठरला. त्यानेही दोन चारचाकींसाठी महिन्याकाठी प्रत्येकी ५५ हजार रुपये देण्याचा करार केला. त्यानंतर आगाऊ रकम ५५ हजार रुपये व्यावसायिकांच्या हाती देत त्याने पळ काढला. त्यानंतर कोणताही संपर्क न ठेवता संशयिताने फसवणूक केल्याचे उघड झाले. पंधरा लाखांची वाहने पंचावन्न हजारात नेल्यासह फसवणूक केल्याचा गुन्हा गंगापूर पोलिसांनी दाखल केला आहे.
सिडको येथील श्रावण सेक्टर परिसरात राहणाऱ्या शारदा श्रीधर वाढेकर (४३) यांचा व्यवसाय आहे. गंगापूर रोड परिसरातील सावरकरनगर भागात त्यांचे कार्यालय आहे. तिथे संशयित संतोष जीवनलाल भावसार (३६ रा. मालवाणी बस डेपोजवळ, मुंबई) आणि वाढेकर यांच्यात व्यवहार ठरला. वाढेकर आणि त्यांचे सहकारी जालिंदर भानुदास वाडेकर यांच्याशी करारनामा झाला. वाढेकरांच्या कार्यालयाच्या नावाने असलेल्या दोन्ही चारचाकी प्रत्येकी ५५ हजार दरमहा भाडेतत्त्वावर देण्याचा करार करण्यात आला. त्यानुसार संशयित भावसारने आगाऊ रकम ५५ हजार रुपये वाढेकरांना दिली. त्यानंतर दोन्ही वाहने स्वत:च्या ताब्यात घेत भावसार निघून गेला. त्यानंतर कोणतीही रकम न देता वाहनांबाबतही उत्तरे देण्यास टाळाटाळ केली. १ ते ९ फेब्रुवारी दरम्यान हा व्यवहार झाला. त्यामध्ये सात आणि आठ लाख रुपयांच्या दोन चारचाकींचा समावेश आहे. एकूण पंधरा लाखांच्या चारचाकी नेत फसवणूक केल्याप्रकरणी गंगापूर पोलिसांनी गुन्हा दाखल केला आहे. संशयित भावसारला लवकरच अटक होण्याची शक्यता आहे. तर, या प्रकरणी सहायक पोलिस निरीक्षक पी. बी. सूर्यवंशी पुढील तपास करत आहेत.
खासगी वापराचे कारण
मुंबईत विविध ग्राहकांच्या वापरासह खासगी कार्यालयाच्या वापरासाठी चारचाकीचा वापर करेन, अशी बतावणी संशयित संतोष भावसार याने केली होती. त्यानुसार कायदेशीर प्रक्रिया पार पाडण्याचे ठरले. करार करण्यात आला. मात्र, त्याने पुढील पैसे दिले नसल्याची तक्रार वाढेकरांनी केली आहे. त्यानुसार पोलिस पुढील तपास करत आहेत.