शेअर मार्केटमध्ये ‘ट्रेडिंग अकाउंट’धारकाच्या परवानगीशिवाय अज्ञात मोबाइलधारकाने दीड लाख रुपये किमतीचे शेअर्स खरेदी केले. कालांतराने त्या शेअरचे मूल्य ढासळल्याने एकूण किंमत दीड लाख रुपयांवरून थेट ११२ रुपयांवर आली. या प्रकारामुळे मोठा आर्थिक फटका बसलेल्या ट्रेडिंग अकाउंटधारकाने फसवणुकीचा गुन्हा दाखल केला.
पोलिसांनी दिलेल्या माहितीनुसार, आरोपीने तक्रारदाराच्या ‘ट्रेडिंग अकाउंट’चा ‘यूजर आयडी’ आणि ‘पासवर्ड’चा वापर करून एका कंपनीच्या ६२ हजार ७०० ‘ऑप्शन शेअर’ची खरेदी केली. त्यासाठी एक लाख ४४ हजार २१० रुपये मोजावे लागले होते. त्या एका शेअरचे मूल्य त्या वेळी दोन रुपये ३० पैसे होते. मात्र, कालांतराने त्या शेअरची किंमत कमी होऊन पाच पैशांवर गेली. त्यामुळे त्या शेअरमध्ये गुंतवलेल्या एक लाख ४४ हजार रुपयांपैकी केवळ ११२ रुपयेच उरले. हा संपूर्ण व्यवहार करताना मोबाइलधारकाने तक्रारदाराशी कसलीही चर्चा केली नव्हती. शेअर खरेदीपूर्वी त्यांना पूर्वकल्पनाही दिली नव्हती. त्यामुळे आपली फसवणूक झाल्याचे तक्रारदाराने तक्रारीत नमूद केले आहे.
वर्षात ९०हून अधिक तक्रारी
शेअर मार्केटमध्ये गुंतवणूक करणाऱ्यांची संख्या गेल्या वर्षी मोठ्या प्रमाणात वाढली आहे. शेअर मार्केटमधील व्यवहारात फसवणुकीचे प्रकारही वाढले आहेत. गेल्या वर्षात शहर सायबर पोलिसांकडे फसवणुकीच्या एकूण ९१ तक्रारी दाखल झाल्या आहेत.
असुरक्षित गुंतवणुकीने फटका
– शेअर ट्रेडिंगसाठीच्या मोबाइल अॅपची संख्या वाढली.
– घरबसल्या खाते उघडणे आणि व्यवहार करणे झाले शक्य.
– जास्त परताव्याच्या आमिषाने असुरक्षित पद्धतीने गुंतवणूक केल्यानंतर बसतो फटका.