करोना लॉकडाउनमुळे बेरोजगार झालेले धारावीतील काही तरुण नोकरीच्या शोधात होते. नोकरीसाठी त्यांना एका प्लेसमेंट कंपनीमधून फोन आला. नोकरी आणि तीही दुबईत मिळत असल्याने सर्वच खूष झाले. पासपोर्ट काढले, विमान तिकीट, व्हिसासाठी पैसे भरले, वैद्यकीय तपासणी करून घेतली. मोठ्या उत्साहाने दुबईला जाण्यासाठी विमानतळावर पोहोचले. तिथे पोहोचल्यावर विमान तिकीटे बनावट असल्याचे समजले आणि आपली फसवणूक झाल्याचे समजले.
धारावीत राहणाऱ्या सात ते आठ जणांनी विविध संकेतस्थळांवर नोकरीसाठी नोंदणी केली होती. मालाड येथील ब्राइट फ्युचर मॅनपॉवर कन्सल्टन्सीमधून त्यांना नोकरीसाठी फोन आला. दुबईमध्ये नोकरी उपलब्ध असून जाण्याची इच्छा असल्यास कळविण्यास सांगितले. रोजगार मिळतोय आणि परदेशात जाण्याची संधी मिळत असल्याने सर्वांनीच यासाठी होकार दिला. कन्स्लटन्सीच्या मालाड येथील कार्यालयात सर्व तरुणांची मुलाखत घेण्यात आली. मुलाखतीमध्ये पास होताच त्यांना विमानाची तिकीट आणि व्हिसा बनविण्यासाठी पैसे भरण्यास सांगण्यात आले. दोन वर्षांचा व्हिसा आणि दुबईत महिना तीस हजार रुपयांची नोकरी देण्याचे ठरले. या सर्वांनी कसेबसे पैसे जमा करून सुमारे एक लाख ३० हजार रुपये कन्सल्टन्सीच्या कार्यालयात जमा केले. पैसे जमा केल्यावर सांताक्रूझ येथे जाऊन त्यांना वैद्यकीय तपासणी करण्यास सांगितले. ही प्रक्रियाही त्यांनी पूर्ण केली आणि व्हिसा, तिकीट मिळण्याची वाट हे तरुण करीत होते.
डिसेंबरमध्ये त्यांच्या मोबाइलवर कन्स्लटन्सीच्या वतीने तिकीट आणि व्हिसाची प्रत पाठविण्यात आली. विमानतळावर गेल्यावर दुबईतील कंपनीचे अधिकारी तुम्हाला कंपनीपर्यंत घेऊन जातील असे सांगण्यात आले. परदेशात जात असल्याने सर्वच जण खूष होते. २७ डिसेंबर रोजी सर्व तयारीनिशी हे तरुण विमानतळावर पोहोचले. तपासणीकरिता त्यांनी विमानाच्या तिकीटांची छायांकित प्रत पुढे केली. तिकीट खिडकीवरील कर्मचाऱ्याने तिकीटे बोगस असल्याचे सांगताच या तरुणांना धक्का बसला. त्यांनी संबंधित एअरलाइन्सच्या कस्टमर केअर क्रमांकावर संपर्क करून खात्री केली असता, अशी कोणतीही तिकीटे कंपनीकडून जारी झाली नसल्याचे सांगण्यात आले. कन्स्लटन्सीकडे याबाबत विचारणा केली असता उडवाउडवीची उत्तरे मिळाली. त्यांना पैसे परत मिळावे, यासाठी या तरुणांनी बांगूरनगर पोलिस ठाण्यात तक्रार केली आहे.