कौटुंबिक कारणामुळे राहत्या घरातून निघालेल्या पत्नीचा पाठलाग करून तिच्या अंगावर दुचाकी घालण्याचा प्रकार गंगापूर नाका येथे घडला. या प्रकरणात पत्नीच्या दुचाकीला ठोसर मारली. त्यानंतर तिच्या अंगावरून दुचाकी घातल्याने झालेल्या अपघातात सदर महिला जखमी झाली. या प्रकरणी दिलीप निंबाजी देवरे (वय ४९, रा. कोंडदेवनगर) याच्याविरुद्ध खुनाच्या प्रयत्नाचा गुन्हा दाखल झाला आहे.
देवरेचे त्याच्या पत्नीसमवेत सकाळी किरकोळ कारणावरून वाद झाले. त्यानंतर सदर महिला घरातून निघून गेली. तिचा पाठलाग करीत देवरे गंगापूर नाक्यापर्यंत पोहोचला. सिग्नल बंद असल्याचा फायदा घेत पत्नीच्या दुचाकीवर तो मागे बसला. त्यावेळी घरी चर्चेसाठी यावे, असे त्याने सांगितल्यावर पत्नीने नकार दिला. त्याचा राग आल्याने पत्नीला शिव्या देत स्वत:ची दुचाकी चालू केली. त्यानंतर पत्नीला जीवे ठार मारण्याच्या उद्देशाने तिच्या दुचाकीला ठोसर मारली. त्यामुळे महिला रस्त्यावर पडली. त्यावेळी पुन्हा तिच्या अंगावर दुचाकी घालून देवरे याने जखमी केले. या प्रकरणी सरकारवाडा पोलिसांनी देवरेविरुद्ध खुनाचा प्रयत्नाचा गुन्हा दाखल केला. संशयित देवरे याला अटक करण्यात आली आहे.