जगभरात कोरोना (कोविड-१९) व्हायरसचा नवीन प्रकार ओमिक्रॉनची प्रकरणे पुन्हा एकदा वाढत आहेत आणि त्याचा परिणाम अर्थव्यवस्थेवरही दिसून येत आहे. आयफोन बनवणारी जगातील आघाडीची टेक कंपनी अॅपलने न्यूयॉर्कमधील त्यांची सर्व दुकाने ब्राउझिंगसाठी बंद केली आहेत. सीएनएनच्या मते, ऑनलाइन ऑर्डरिंग आणि जिनियस बार सपोर्टसारख्या वॉक-इन सेवा सुरू ठेवल्या आहेत.
‘आम्ही परिस्थितीवर बारकाईने लक्ष ठेवून आहोत. आम्हाला आमच्या ग्राहकांचे आणि कर्मचाऱ्यांचे आरोग्य धोक्यात घालायचे नाही, म्हणून हे पाऊल उचलले आहे,’ असे कंपनीने एका निवेदनात म्हटले आहे. दोन आठवड्यांपूर्वी कंपनीने अमेरिकेतील रिटेल स्टोअरमध्ये (किरकोळ विक्रीच्या दुकानांमध्ये) प्रत्येकासाठी मास्क घालणे अनिवार्य केले. कोरोना आणि ओमिक्रॉनच्या वाढत्या केसेस पाहता असे करण्यात आले आहे. कंपनीने फ्लोरिडा, मेरीलँड आणि कॅनडामधील त्यांची दुकाने तात्पुरती बंद केली आहेत.
न्यूयॉर्कमध्ये वाढतायत रुग्ण
न्यूयॉर्कमध्ये कोरोनाचे रुग्ण झपाट्याने वाढत चालले आहेत. त्यामुळे परिवहन विभागाने या आठवड्यात मर्यादित गाड्या चालवण्याचा निर्णय घेतला आहे. सर्वच गाड्या चालवण्यासाठी कर्मचारीच नसल्याचे विभागाचे म्हणणे आहे. ख्रिसमसच्या पहिल्या दिवशी न्यूयॉर्क प्रांतात कोरोनाचे विक्रमी ४९,७०८ रुग्ण आढळले. सोमवारी (२७ डिसेंबर) न्यूयॉर्क शहरातील कोरोनाच्या नवीन रुग्णांची संख्या १७,३३४ वर पोहोचली आहे. शहराचे महापौर बिल डी ब्लासिओ म्हणाले की, ‘लवकरच शहरातील पॉझिटिव्ह प्रकरणांची संख्या उच्चांकी पातळी गाठू शकते.’