बाळाचा जन्म झाल्यानंतर रुग्णालयातून पलायन करणाऱ्या वडिलांना कळवा पोलिसांनी तब्बल २३ महिन्यानंतर मुंबईतील मुलुंड परिसरातून अटक केली आहे. कळव्यातील छत्रपती शिवाजी महाराज रुग्णालयात मुलीचा जन्म झाल्यांनतर तिच्या पालनपोषणाची जबाबदारी न स्वीकारता आई, वडील पळून गेले. शिवाय त्यांनी रुग्णालयात स्वतःचे नाव आणि पत्ताही खोटा सांगितला होता. त्यामुळे मुलीच्या पालकांचा शोध घेणे अवघड अवघड झाले होते. या प्रकरणी मागील वर्षी ७ जानेवारी रोजी कळवा पोलिस ठाण्यात गुन्हा दाखल करण्यात आला होता. कळवा पोलिसांनी मुलीच्या आई-वडिलांचा शोध घेतला. मात्र, त्यांचा काही शोध लागला नाही. परिणामी या गुन्ह्याचा तपास पोलिसांनी बंद केला. परंतु, पुन्हा या गुन्ह्याचा कळवा पोलिसांनी तपास करत आरोपींचा शोध सुरू केला. अखेर २३ महिन्यानंतर सहाय्यक पोलिस निरीक्षक प्रकाश दिनकर, पोलिस उपनिरीक्षक घागरे आणि इतर पोलिस कर्मचाऱ्यांच्या पथकाने बाळाच्या वडिलास मुलुंड कॉलनी परिसरातून ताब्यात घेऊन अटक केली. ही मुलगी आता २३ महिन्यांची झाली असून सध्या हे बाळ नवी मुंबईतील विश्व बालक केंद्रात आहे. आरोपीने हा गुन्हा पत्नीच्या मदतीने केला असून हे दाम्पत्य मूळचे उत्तर प्रदेशचे असल्याची माहिती पोलिसांनी दिली. मुलगी झाल्यामुळे आरोपींनी रुग्णालयातून पळ काढला असल्याची माहिती पोलिसांनी दिली. पालक सोडून गेले त्यावेळी हे बाळ केवळ आठ दिवसांचे होते.