मद्यप्राशन करून घरी का आला, असा जाब विचारत मुलास घराबाहेर काढणाऱ्या साठवर्षीय वृद्ध मातेचा मद्यपी मुलाने ढकलल्याने सिमेंटच्या खांबावर पडून डोक्यास वर्मी मार लागल्याने अतिरक्तस्त्राव होऊन मृत्यू झाल्याची घटना मेरी कॉलनीत शुक्रवारी पहाटे घडली.
या प्रकरणी पंचवटी पोलिसांनी संशयित आरोपी प्रशांत कचरू पवार (वय ३३, रा. मेरी कॉलनी) याच्याविरोधात सदोष मनुष्यवधाचा गुन्हा दाखल केला. या घटनेत विमल कचरू पवार (६०) यांचा मृत्यू झाला. पोलिसांनी दिलेल्या माहितीनुसार, प्रशांत आणि त्याची आई असे दोघेच घरात राहत होते. शुक्रवारी पहाटे तीन वाजेच्या सुमारास संशयित प्रशांत घरी आला. कामधंदा नसलेल्या प्रशांतला मद्यपानाचे व्यसन असल्याने आईकडून त्याला सतत विरोध व्हायचा. आईने मद्य प्राशन करून आलेल्या प्रशांतला घरातून बाहेर काढले. ती त्याचा हात धरून इमारतीच्या गेटवर पोहोचली. यावेळी प्रशांतने आईला धक्का दिला. त्यात विमल पवार यांचे डोके गेटच्या खांबावर (बीम) आपटले. त्यातून रक्तस्त्राव सुरू झाला. घाबरलेल्या प्रशांतने जखमी आईला सावरले. तो तिला घेऊन पुन्हा घरात आला. तिथे तिला अंथरुणावर झोपवून तिच्या अंगावर पांघरूण घातले. नंतर तोही झोपी गेला. मात्र, विमल पवार यांच्या डोक्याला गंभीर दुखापत झाली होती. त्यातून रक्तस्त्राव सुरूच राहिल्याने सकाळपूर्वीचा त्यांचा मृत्यू झाला. सकाळी झोपेतून जागे झालेल्या संशयित प्रशांतने आईला उठविण्याचा प्रयत्न केला. त्यावेळी ही घटना उघडकीस आली. घाबरलेल्या प्रशांतने जवळच्या म्हसरूळ पोलिस ठाण्याची चौकी गाठली. तेथे त्याने झाला प्रकार सांगितला. मात्र, ती हद्द पंचवटी पोलिस ठाण्याची असल्याने ही माहिती पंचवटी पोलिसांना देण्यात आली. पोलिसांनी लागलीच घटनास्थळ गाठले.