प्रवाशाने ज्या विमानाने प्रवास केला, त्या विमानाने त्याचे सामान मात्र तिथे पोहोचलेच नाही. त्यात असलेली आवश्यक औषधे मिळू न शकल्याने त्या महिला प्रवाशाला खूप त्रास सहन करावा लागला. हे सामान दोन दिवसांनंतर त्यांच्याकडे पोहोचले. इंडिगो एअरलाइन्सने मुंबई ते भोपाळ असा प्रवास करणाऱ्या नीता जोशी यांच्या बाबतीत हा प्रकार अलीकडेच घडला.
सीएसआर क्षेत्रात कार्यरत असलेल्या नीता जोशी यांना भोपाळ येथे एका परिषदेसाठी जायचे होते. त्यासाठी त्यांनी शनिवारी रात्री जाणाऱ्या इंडिगोच्या विमानाची निवड केली. त्यांच्याकडे केवळ दोन बॅग होत्या. त्यापैकी एका बॅगेमध्ये त्यांना परिषदेत परिधान करण्यासाठीची वस्त्रे, चांदीचे दागिने, लॅपटॉप चार्जर व सर्वात महत्त्वाचे म्हणजे हृदयविकाराशी निगडित औषधेदेखील होती. नेमकी हीच बॅग इंडिगोकडून भोपाळला पोहोचलीच नाही. त्यामुळे जोशी यांना चांगलाच त्रास सहन करावा लागला.
याबाबत जोशी यांच्याशी ‘महाराष्ट्र टाइम्स’ने संपर्क साधला असता त्यांनी सांगितले की, ‘दोन्ही बॅगा मी केबिन सामान म्हणून सोबत बाळगणार होते. दोन्ही बॅगचे वजन मर्यादितच होते. पण विमानतळावर ऐनवेळी इंडिगोच्या कर्मचाऱ्यांनी दुसरी बॅग चेक इनमध्ये टाकण्याचा हट्ट धरला. त्यामुळे मी ती बॅग चेक इनमध्ये टाकली. पण मी भोपाळला पोहोचले तेव्हा ती बॅग तेथे आलीच नाही. त्यामुळे ऐनवेळी तक्रारीसाठी धावपळ करावी लागली. त्यातून त्या बॅगेत महत्त्वाचे सामान असल्याने आणखीनच त्रास झाला. इंडिगोकडून, ‘बॅग शोधत आहोत. मागे लागू नका’, असे धक्कादायक उत्तर दिले जात होते. त्यामुळे अखेर ट्विटरचा आधार घ्यावा लागला.’
इंडिगोकडून सकारात्मक प्रतिसाद येत नसल्याने अखेर जोशी यांनी ट्विटरवर चिंता मांडली. ट्विटरवरदेखील जोशी यांना इंडिगोकडून, ‘आम्ही प्रयत्न करतोय, आम्ही बॅग शोधतोय, थोडा वेळ’, असे साधे उत्तर दोन दिवस दिले जात होते. सोमवारी दुपारपर्यंत या महत्त्वाच्या सामानाबाबत जोशी यांना काहीच माहिती इंडिगोकडून दिली जात नव्हती. सततच्या पाठपुराव्यानंतर सोमवारी दुपारनंतर ही बॅग भोपाळ विमानतळावर पोहोचल्याचे छायाचित्रासह जोशी यांना इंडिगोकडून सांगण्यात आले. पण, त्यावेळी त्या पुढील बैठकीसाठी त्या इंदूरला गेल्या होत्या. त्यामुळे पुन्हा भोपाळला येऊन सामान ताब्यात घेण्याखेरीज त्यांच्याकडे पर्याय नव्हता.
इंडिगोकडून अधिकृत उत्तर नाही
दरम्यान, यासंदर्भात इंडिगोच्या जनसंपर्क विभागाशी संपर्क साधला असता त्यांनी, ‘प्रकरणाची माहिती घेत आहोत. अधिकृत निवेदन लवकरच जारी केले जाईल’, असे सांगितले.