थकलेल्या पगारासह आगाऊ पगार मागितला म्हणून काँग्रेसचे माजी आमदार संजय दत्त यांनी चार तास कोंडून ठेवत मारहाण केल्याचा आरोप डोंबिवलीतील गॅस वितरकाने केला आहे. या प्रकरणी विष्णूनगर पोलिसांनी तक्रार नोंदवून घेत तपास सुरू केला आहे.
डोंबिवली पश्चिमेकडील अंबिका नगर परिसरात माजी आमदार व काँग्रेसचे नेते संजय दत्त यांची शक्ती गॅस एजन्सी आहे. या एजन्सीमध्ये राज यादव मागील २० वर्षांपासून काम करत आहेत. मात्र मागील काही महिन्यांपासून यादव यांचा पगार थकल्याचे त्यांचे म्हणणे आहे. म्हणूनच ३० सप्टेंबर रोजी सकाळी १०च्या सुमारास एजन्सीच्या कार्यालयात यादव त्यांचा थकलेला पगार व आगाऊ पगाराची मागणी करण्यासाठी गेले होते. पगार मागताच संजय दत्त यांनी त्यांच्याशी वाद घालत दमदाटी केली. त्यानंतर दत्त यांनी यादव यांना कोंडून ठेवत मारहाण केल्याचा आरोप करत यादव यांनी विष्णुनगर पोलिस ठाण्यात तक्रार नोंदवली आहे. पोलिसांनी या प्रकरणी अदखलपात्र गुन्हा दाखल केला होता. मात्र न्याय मिळविण्यासाठी यादव यांनी पुन्हा तक्रार अर्ज दाखल करत मारहाण केल्याच्या पुराव्यासाठी पोलिसांनी कार्यालयातील सीसीटीव्ही फुटेज तपासावे आणि मारहाण करणाऱ्या संजय दत्त यांच्याविरोधात कारवाई करण्याची मागणी केली आहे. तर, याबाबत अदखलपात्र गुन्हा दाखल करण्यात आला असून तपास सुरू असल्याचे विष्णुनगर पोलिसांनी सांगितले. याबाबत संजय दत्त यांच्याशी वारंवार संपर्क साधण्याचा प्रयत्न केला असता, तो होऊ शकला नाही.