राष्ट्रवादी काँग्रेसचे प्रवक्ते नवाब मलिक यांनी राणेंच्या वक्तव्यावर तीव्र नाराजी व्यक्त केली आहे. ‘नारायण राणे यांनी मुख्यमंत्र्यांबद्दल ज्या प्रकारची भाषा वापरली आहे, ती निषेधार्ह आहे. हा केवळ मुख्यमंत्र्यांचा नव्हे, तर महाराष्ट्राच्या जनतेचा अपमान आहे. हे कधीच सहन केलं जाऊ शकत नाही,’ असं मलिक यांनी म्हटलं आहे.
‘भारतीय जनता पक्षानं पश्चिम बंगालमध्ये ज्या पद्धतीचं हिंसक राजकारण केलं. वातावरण बिघडवण्याचं काम केलं. त्याच पद्धतीचं राजकारण ते महाराष्ट्रात करू पाहताहेत. पण महाराष्ट्राची जनता ते स्वीकारणार नाही, ही भाषा आणि हे राजकारण महाराष्ट्र कधीच स्वीकारत नाही. कोणी कितीही मोठा असला तरी तो कायद्यापेक्षा मोठा नाही. प्रत्येकावर कायदेशीर कारवाई होते, हे लोकांपुढं गेलं पाहिजे,’ असंही मलिक यांनी म्हटलं आहे.
काय म्हणाले होते नारायण राणे?
जन आशीर्वाद यात्रेच्या निमित्तानं सध्या काही जिल्ह्यात लोकांशी संवाद साधणारे नारायण राणे हे प्रत्येक ठिकाणी शिवसेना व मुख्यमंत्र्यांना लक्ष्य करत आहेत. महाड इथं काल मुख्यमंत्र्यांबद्दल बोलताना राणे पुन्हा एकेरीवर आले. त्यांनी मुख्यमंत्र्यांच्या कानाखाली वाजवण्याची भाषा केली. ‘मुख्यमंत्र्यांना काहीच कळत नाही, ते आम्हाला काय सांगणार. ते काय डॉक्टर आहेत का? तिसऱ्या लाटेचा आवाज त्यांना कुठून आला? त्याला बोलायचा अधिकार तरी आहे का? बाजूला एखादा सेक्रेटरी ठेव आणि विचारून बोल, असं राणे म्हणाले. देशाला स्वातंत्र्य मिळून किती वर्षे झाली हेही माहीत नाही? मी असतो तर कानाखालीच चढवली असती,’ असं राणे म्हणाले होते.
नारायण राणेंची मुख्यमंत्र्यांबद्दल आक्षेपार्ह भाषा; राष्ट्रवादी भडकली!
