अंबरनाथ येथील कल्पना मगर या विवाहित महिलेला फेसबुकवरील दिल्ली येथील एका महिलेशी मैत्री चांगलीच महागात पडली आहे. घरची आर्थिक परिस्थिती बेताची असल्याचे फेसबुकवरील मैत्रिणीला सांगितल्यानंतर किडनी विकून चार कोटी रुपये मिळवण्याचा सल्ला या मैत्रिणीने दिला. मात्र, त्यासाठी आधी बँकेच्या खात्यात १० लाखांची आगाऊ रक्कम भरण्यास सांगत अंबरनाथ येथील घरकाम करणाऱ्या कल्पना मगर या महिलेची तीन लाख रुपयांची फसवणूक करण्यात आली आहे. या प्रकरणी शिवाजी नगर पोलिस स्टेशनमध्ये फसवणुकीचा गुन्हा दाखल करण्यात आला आहे.
अंबरनाथ पूर्वेतील सीएनजी पंप, म्हाडा कॉलनी येथे राहणाऱ्या कल्पना मगर (३०) यांची दिल्ली येथील रबिना बादी (२५) या महिलेशी फेसबुकवर ओळख झाली. यानंतर दोघीमध्ये रोज फेसबुक चॅटिंगच्या माध्यमातून संवाद होत असताना रबिना हिने कल्पनाला कुटुंबाबद्दल विचारले असता, आपल्याला चार मुले असून घरची आर्थिक परिस्थिती बिकट असल्याचे कल्पनाने सांगितले. यावर रबिनाने माझे आयुष्य सुखी समाधानी असून मी माझी किडनी विकून त्यातून चार कोटी रुपये मिळवले असल्याचे कल्पनाला सांगितले. त्यामुळे तू तुझी एक किडनी विकलीस तर तुलाही चार कोटी रुपये मिळतील. मात्र, त्यासाठी १० लाख रुपये आगाऊ रक्कम द्यावी लागेल, असे रबिनाने सांगितले. यानंतर अरविंद कुमार या व्यक्तीच्या दिल्ली येथील पंजाब नॅशनल बँकेच्या शाखेतील खात्यात कल्पनाने गेल्या काही महिन्यांत तीन लाख रुपये पाठवले होते. मात्र, पैसे भरूनही आपल्याला किडनीदान करण्यासाठी नेले नाही. तसेच रुबिनाकडे पैसे मागितले असता तिने कल्पनाशी संपर्क बंद केल्याने फसवणूक केली म्हणून याप्रकरणी कल्पनाने शिवाजी नगर पोलिस स्टेशनमध्ये रुबिनाच्या विरोधात गुन्हा दाखल केला आहे. अंबरनाथ, बदलापुरात यापूर्वीही दिल्ली येथील काही टोळ्यांकडून चालवलेले बेकायदा किडनीविक्रीचे रॅकेट समोर आले होते. या प्रकरणात रुबिनाच्या विरोधात असे रॅकेट चालवण्याविरोधातही गुन्हा दाखल करून तपास करण्याची गरज असल्याचे मत व्यक्त होत आहे.